Izakhamizi zeDambashoko sezilala emithonjeni ukuze zithole amanzi aseludubo esigabeni lesi eGwanda North. Lokhu kuza ngesikhathi uzulu ebhekane lendlala eyesabekayo.
Izakhamizi zeDambashoko zithwele amagabha avuzayo ngenxa yendlala lokusilela kwamanzi.
UNkosikazi Ntombizabo Sibanda oyisakhamuzi seDambashoko uthi okwalonyaka kakaze akubona selokhu wazalwa.
“Siphakathi kwendlala ebuhlungu, asilalutho ,asila yona iplan esilayo ,okwamanzi sesithwele nzima akula lapho esingayakhona ngoba amadamu atshile wonke,ludaka, izifuyo zethu sezibanjelwa,akulalutho esiluzuzayo kumbe esikuphiwayo ngitsho okukodwa,lokhu saqala umnyaka angikaze ngikubone lokhu.”
Isakhamuzi seGwanda North
Ugogo uPercy Mlotshwa uthi ukuswelakala kwamanzi sekuphazamisa impilakahle yakhe.
“Mina ngiyabona ngelenyanga yonke angikwazi ukugeza, lizwa njani nxa kunjalo, siyacela ukuthi uhulumende asincedise bakithi ngoba vele sithembe yona, mina ngokwami angikwanisi kuthwala, aekulalwa emanzini. Bahambile izolo babuya bengelalutho, kuyathontha angisakwanisi kiuhamba,ngileminyaka engu82.”
UMnu. Nehemiah Siziba uthi inengi labantu emakhaya lihlaselwe yindlala ngoba lukabanye abangatholi uncedo lokudla.
“Silodubo lwamanzi lokudla, kasiholi khonapha kulabanye abaholayo ukudla ,abahola ngabe World Vision lalaba abalungisa imigwaqo, abanengi yindlala kuphela.”
UNkosikazi Nelly Moyo uthi sokunzima ukuziphilisa ngezifuyo ngoba ziyacuba.
“Indlala leyi iyahlukuluza kakhulu abantu, ihlukuluze izinyamanzana zethu okuyikho osekusiwisile ukuthi sibe ngabantu abalento zabo ezibasizayo, kulabanye abagulayo abaphila ngamaphilisi abafuna ukudla okweneleyo engikunanzelelayo yikuthi abanye lonyaka bazabanjwa yiKwash ngoba ukudla okneleyo akutholakali kuthowla ngabalutshwane.”
Izifuyo sezicuba eGwanda North ngenxa yokuswelakala kwamadlela lamanzi
UMnu. Christopher Mnguni uthi sebephatheke kunhlelo zentuthuko esigabeni lapho abathenjiswe ukuthi bazaholiswa ukudla ngemva kokusebenza.
“Kunzima lapha ezifuyweni lasebantwini, amanzi awasekho njalo akulamsebenzi emakhaya lapha ukuthi singathi siphephela ngaphi ,silungisa lemigwaqo sihamba sivala indonga lapha emakhaya yizo inhlelo okuthiwa zisasincedisa kodwa kasikalutholi uncedo lwakhona.”
UKhansila kaWard 2 eGwanda North uNkosikazi Zwelibanzi Mpofu uthi sesiside isikhathi abantu bengatholi ukudla okuvela kuhulumende.
“Abantu yebo bake bahola kuSocial Welfare kodwa bacine ukuhola ngoApril sikhuluma kunje kathesi nguAugust , ungake uthutshe le10kg yempuphu kwazi ukuthi lizayiqumelana imizi emibili emithathu,inkomo ziyacuba sekuhlinzwa mihla ngemihla lamadamu segcwele udaka .”
Inhlanganiso yamazwe omhlaba enakekela uzulu ngesikhathi sendlala iWorld Food Programme ithi uzulu weZimbabwe ofika phose izigidi ezilitshumi ubhekane lendlala eyesabekayo.
SEE ALSO:
Udaba Esilwethulelwe NguAlbert Ncube