Izakhamizi zeHwange ngaphansi kwenduna uMvuthu zithi sezilotshelwe incwadi ngabaphathi bezikolo bezithembisa ukuzithathela impahla ngenxa yokungabhadali imali yabantwana besikolo.
Izakhamizi lezi zithi zalotshelwa incwadi ngabaphathi bezikolo eziqoqela iChimbombo, Ndlovu, Chidobe, Bethesda lezinye ngesizatho sokungakhokhi imali yabafundi okwebanga elide. Izikolo zathuma amapholisa esigaba ukuyanika abazali incwadi lezi.
Bebuzwa ngembangela yalokhu, UNkosikazi Mary Mpala uthi kalamali njalo emavikini asanda kwedlula wehlelwa yisiga. Ulesikwelede semali yabafundi eye-school fees esifika ikhulu lamatshumi amahlanu amadollar eMelika- $150.
“Bengifuyile, ngahlaselwa ngumuntu khathesi owayephambeni ingqondo wabulala imbuzi zami ekhaya, ngangikhangelele ukubhadala esikolo, kodwa angisazi ukuthi ngenze njani.”kutsho uMaMpala.
UNkosikazi Sikhululekile Ncube laye ngomunye wabaphiwe incwadi ngamapholisa esigaba lesi. Bafuna akhokhe imali yabafundi abayisithupha loba engelamali.“Vele ukuthi nzabhadala malini, ngani, ngixhamandile ngathi kumbe ngabe bayangidobhela oyedwa bemfake ku BEAM, kunje oyedwa ngimkweledele eclubini ukuthi ayebhalisela imhloliso, lembuzi ngisele le three, ngingavala kambe?”
UNkosikazi Shylene Mathe weChisuma ubhekane lesikwelede esifika amatshumi ayisikhombisa samadollar eMelika - $70.
Uthi baphiwe inyanga ezintathu ukuba bebhadale isikwelede lesi. Usephelelwe uNkosikazi Mathe.
“Bayabuya bezothumba, loba yini abazayithola bayathengisa bebhadale imali yabo.”
Kodwa uMaMathe uthi isigaba lesi kasilandlela yokwenza imali.
Ucela uncedo kuhulumende. Ongu proportional representative counsel eChisuma,uNkosikazi Sikhanyiso Moyo, uthi indaba yama fees ilukhuni ngoba incwadi zathi kungedlula inyanga ezintathu uyasiwa koMlisa.
“Ufika koMlisa laye uzakupha ezakhe inyanga nxa ungakwanisanga sebekufilisa ama form ama debt collectors, ngikhuluma kunje eChidobe Secondary baphiwa engingakabi kwazi ukuthi ama debt collectors sabapha yini incwadi.”
Ukhansila omele lezizakhamizi, uMnumzana Given Moyo, uthi uhulumende ngabe uyangenela njengoba minyaka yonke yokhetho ehlala ethembisa imfundo yamahala.
“I-free education yonaleyo kufanele ikhangelele abantu abalenswelo ezitshiyeneyo, ikakhulu abantu abasemaphandleni ngoba ukuzala lilungelo kodwa kulenhlupho ezifana lobuyanga, indlala lokusweleka kwamandla okusela nje,” kutsho uMoyo.
Imizamo yokuxhumana lesikhulumeli sezemfundo yehlule, kodwa emhlanganweni wabaphathi bezikolo owaqhutshelwa edolobheni le Victoria Falls kunyangephelileyo, abaphathi bakhala ngokuba uhulumende, phansi kohlelo lwe Basic Education Assistance Module (BEAM) kakhokhi imali yabantwana njalo isikwelede lesi sesiphezulu kakhulu.
Okugatsha lukahulumende olubona ngezemfundo ephansi, uMnumzana Torerayi Moyo, wakuvuma ukuba kulenkinga ekubhadaleni imali yeBEAM, kodwa wathi bayalungisa. Wakhuthaza abaphathi ukuba behlise inani labantwana abaphansi kohlelo lolu esithi labo badonsa nzima.
Waqoqonsela njalo ukuba abafundi akufuzanga bexotshwe ezikolo ngenxa yokuswela imali ye school fees.
Forum