lnhlanganiso yomanyano wamazwe omhlaba eyeUnited Nations ithi isithole izigidi ezilikhulu zamadollar eMelika – US$100 million United States dollars -- eyokuthengela abantu abalambayo ukudla abafika izigidi ezintathu – 3 million eZimbabwe ababhekane ledlala enkulu lonyaka.
Lokhu kwethulwe namuhla koBulawayo nguNkosikazi Valerie Gaunieri, umsekeli womqondisi obona ngezokudla lokunye kunhlanganiso yeWorld Food Program, obesemhlanganweni wokuhlolisisa isimo sendlala ebangelwe yisikhudumezi somkhathi ese-El Nino esithwalise nzima umhlaba wonke jikelele.
"Sizabe sincedisa abantu ngokudla emakhaya kuthi emadolobheni umuntu munye ngamunye emulini uyabe ethola amadola emelika alitshumi lantathu.
Kulabantu abafika phose izigidi ezilitshumi - 9 million eZimbabwe abebhekane lendlala eyesabekayo lonyaka. Uhulumende udinga uncedo lwemali efika amabhiliyoni amabili – US$2 billion eyokuthengela abalambayo ukudla. UNkosikazi Reena Ghelani umabhalane jikelele eUnited Nations obona ngenhlupho ezibangelwa ngumumo womkhathi uthi imali abayitholileyo izanceda kakhulu abalambayo.
"Sisebenza gadalala kumizamo yokubona ukuba eleZimbabwe lizaphepha engozini ezibangelwa yikuguquka komumo womkhathi ngoba singekela ukukulungisiisa kusiyafika umnyaka ka2050 ilizwe lizahlangana lenhlupho ezinengi ezibangelwa yikuguquka kwezomumo womkhathi.”
Ababili laba ngabanye abakunhlanganiso ezitshiyeneyo abangene umhlangano koBulawayo obekuhlolisiswa khona isimo sabalambayo eZimbabwe. Banengi ababhekane lendlala lonyaka lemadolobheni. Omunye wabo nguNkosikazi Nokuthaba Mlotshwa.
"Ungananzellela indlala engibhekane layo angikaze ngiyibone eminyakeni siyasilime egaangeni sithole. Kunsuku ezedlule uhulumende ebethi sibhalise amabizo kodwa asikakutholi sesilamba."
UMnu. Vumani Ndlovu ohlala eLupane laye uthi indlala ibathwalise nzima emaphandleni.
"Ayisibo bonke abatholayo njali akubeneli kunje bakhona asebelala ngendlala eLupane.”
Isakhamuzi sePlumtree koZimnyama, uMnu Mathetha Masuku, laye uthi isomiso sibi esigabeni sakhe.
"Indlala isihlasele imizi yonke kodwa uhulumennde useqalile ukusitholisa ukudla."
Text: Uhulumende weZimbabwe uqhuba ezinye njalo inhlelo zokuholisa abalambayo ukudla. Ukudla lokhu kunikwa izinduna, amakhansila labosubhuku abakuholisa abalambayo.
Forum