Izakhamizi zeNkayi, Gwanda, Tsholotsho lezinye izigaba eMatabeleland zithakazelela inhlelo ezigoqela ezokulima lezokunika uzulu ukudla eziqhutshwa nguhulumende weMelika.
Uhulumende weMelika ebambisana lohlangothi olubona ngenswelo zika zulu olweUnited States Agency for International Development lezinye uquba uhlelo olwaziwa ngokuthi yiAmalima Loko, esigabeni seBinga, Hwange, Lupane, Nkayi leTsholotsho.
Kulemizi efika phose inkulungwane ezingamatshumi ayisitshiyangalombili – 67,000 ephansi kohlelo lolu olukhangelane lokuthi kube lokudla okwanele abalambayo sikhathi sonke njalo kusetshenziswe indlela ezitshiyeneyo zokuholisa uzulu ukudla kanye lezokulima.
Lungaka sungulwa uhlelo lolu kwakulolubizwa ngokuthi ngamalima olwalulezakhamizi ezedlula inkulungwane ezilikhulu – 118,000 eBulilima, Gwanda, Mangwe leTsholotsho.
Kulabantu abanengi abathi ziyanceda kakhulu inhlelo lezi. Omunye wabathakazelela inhlelo lezi nguNkosikazi Sihle Nhliziyo ohlala eMadlozi eNkayi esabelweni seMatabeleland North.
"Umntanami uSiyabonga Nhliziyo uselenyanga ezilitshumi lanye lokhe ngihola impuphu yelamambazi lamafutha njalo lokhu kudla kuqakathekile ngoba umntanami ubutshelezi, uyatshaya esikalini kafubanga ukhula kuhle."
UNkosikazi Thandekile Ndebele laye uthi waqala ukuthola amafutha lempuphu yelambazi elenyanga ezine ezithwele.
"Umntanami uselomnyaka lenyanga ezilitshumi lokhe sihola impuphu yelambazi enonisiweyo lamafutha. Umntanami ukhula kuhle kafubanga njalo ubutshelezi lesikali uyasiqamula. Siyalubonga uhlelo lweAmalima Loko ngoba luqeda indlala lokufuba."
Uhlelo lweAmalima Loko lukhangelelwe ukuba luzanceda abantu abanengi ngesikhathi sendlala enkulu eZimbabwe ebangwe yisikhudumezi somkhathi ese-El Nino. Umqondisi weRural Communities Empowerment Trust, uMnu. Vumani Ndlovu, uthi uhlelo lolu luhle kakhulu.
"Uhlelo lukahulumende olweAmalima Loko luhle sibili kodwa ungananzelela indlala yalonyaka itshayile njalo akusuyewonke umuntu olambayo othola usizo, bakhona abalokhe besalinde ukuthi mhlawumbe bengancediswa ngokudla."
Ingcwethi kwezomumo womkhathi lokwenqabela ingozi, uMnu. Everson Ndlovu, ongumbalisi ekolitshini yemfundo yaphezulu eNational University of Science and Technology, uncoma inhlelo ezehlukeneyo eziqhutshwa nguhulumende weMelika eMatabeleland.
"Ungananzelela zinengi inhlelo sokuhlomisa izakhamizi eziqhutshwa yiAmalima loko ezibalisa ukutholisa amanzi ahlanzekileyo, ezempilakahle, ukulima kuhlanganisa lokutholisa omama abazithweleyo, abamunyisayo labantwana impuphu yelambazi lamafutha emizameni yokumelana lengozi yendlala ebhekane lelizwe kulandela ukungani kuhle kwezulu. Lokhu kuhle njalo kwenqabela indlala ezigabeni laphi abasebenza khona."
Text: Isikhulumi seAmalima Loko, uMnu. Keith Moyo, uthi uhlelo lolu lokutholisa ukudla abesifazane abazithweleyo, abamunyisayo labantwana.
"Sisebenza lohulumende weZimbabwe lenhlanganiso ezehlukeneyo emizameni yokumelana lendlala ngokutholisa icorn soya lamafutha emulini ezehlukeneyo ukuze senqabele indlala, ukufuba kubantwana labonina."
Ngokuya kwesikhathi kukhangelelwe ukuba uhlelo lweAmalima Loko luzathuthukisa iziphala zabantu ngedlela ezitshiyeneyo abanye bethole ukudla okwakha umzimba.
Ezinye inhlangothi ezikuhlelo lolu ngeye Bureau of Humanitarian Assistance ebambisana leCNFA.
Forum