Izakhamizi zemaphandleni zisola inyathelo elithethwe nguhulumende lokuvimba ukuthengiswa kwenkomo ezabelweni.
Umphathintambo wezokulima uMnu. Anxious Masuka ubike kunyanga edluleyo ukuthi kasavumeli uzulu ukuthi athengise inkomo emaphandleni esithi sokumele ziyethengiswa emikambo yama-showa.
UMasuka uthe uhulumende uthethe lesisinqumo ngoba kulabanye abantu abathenga inkomo emaphandleni ngentengo ephansi kakhulu.
Ekhuluma eseGaranyemba eGwanda South lapho osekusungulwe izibaya zokugcina inkomo ezihlaselwe yindlala, uMasuka uthe lelinyathelo lizadala ukuthi inkomo zithengwe ngemali efaneleyo.
“Ngithe ngifika lapha ngizwe kuthiwa inkomo bezithengiswa nge$80 , abathengayo besithi ungekela ukungithengisela ngizabuya sengiyithenga nge$50 ngoba kungekho ozayithenga,uhulumende semise ukuthengiswa kwenkomo emakhaya zonke inkomo sekumele zitehengiselwe kumaWard Centre,kuzabekwa amalanga lapho ezizathengiswa khona ukuze lithole imali ephezulu.”
Lanxa uhulumende esithi wenza lokhu ukuze avikele abafuyi, izakhamizi ezixoxe lomsakazo weStudio 7 zithi kazihambelani lalelinyathelo elithethwe nguhumende.
UMnu. Gabriel Moyo isakhamuzi seMawane eGwanda South uthi bathengisa inkomo isikhathi sonke uma bebhekane lendubo ezitshiyeneyo.
“Omunye lomunye ulohlupho lwakhe so nxa mina ngifuna ukuthengisela imali yesikolo sekumele ngimelele abanye ,umuntu kumele akhangele ukuthi kuyini okuhlupha abnatu, akula langa elibekiweyo,benzela ukuthi zibuthane bebesebethatha itax enkomeni yami engiyithelelayo lokuyidingela imithi.”
UMnu. Collen Ngwenya oyisakhamuzi seMatobo laye uthi lumthetho awusoze waphumelela.
“Abantu abathengiseli bunandi, bathengisela uhlupho ukuze bathenge ukudla kwalezi eziseleyo ,ukuze indlala le idlula sisale silenhlanyelo, zingafi zonke sivale izibaya.”
UMnu. Khumbulani Moyo laye uthi inengi selithengisa inkomo ngenxa yendlala kanye lodubo lwamanzi. Ngalokhu-ke uMoyo uthi ngabe okwamanje uhulumende uyavuselela amadamu agcwele inhlabathi hatshi ukuvimba izakhamizi ukuba zithengise inkomo santando.
“Besikhangelele ukuthi aluba ngasithola izinto ezinje ngemitshina zikhuphe udaka ngoba lokhu kudilikela kudala ukuthi lanxa izulu lingaze line amanzi ahlala emalutshwane ayageleza phezulu kombundu ahambe kodwa idamu lingabambi lutho kodwa singakhupha udaka loluyana kuzakuba lamanzi amanengi.”
Abogatsha lwezokulima eZansi yeMaNdebeleni bathi sekufe inkomo ezedlula amakhulu amane - 432 kulesisabelo ngenxa yokuswelakala kwamadlelo.
Inkomo ezedlula izigidi ezimbili - 2.5million elizweni lonke jikelele zilakho ukubulawa yindlala lonyaka ngenxa yokuswelakala kwamadlelo lamanzi.
Forum