Ngqwele Dube
Izakhamizi zeBeitbridge zikhala ngendlala esihlasele kakhulu kulumango esibangela ukuthi ezinengi zidle kanye ngelanga.
Umangoye uselala eziko emizini eminengi eBeitbridge lapho izakhamizi ezithi kazitholanga lutho emasimini lonyaka ngenxa yesikhudumezi somkhathi esidalwe yisimo seEl Niño.
Izakhamizi zikaWard 12, esigabeni seMajini, eSiyoka, zitshele umsakazo weStudio 7 ukuthi uhlelo lukahulumende oluphathisa abalambayo oluqhutshwa lugatsha lweSocial Welfare luncedisa abantu abalutshwana, ikakhulu asebekhulile ikanti indlala ihlasele wonke muntu kulindawo.
UNkosikazi Khathutshelo Ndou, olabantwana ababili - owakuqala oleminyaka yokuzalwa eyisithupha lolenyanga eziyisitshiyangalombili, 8 months - uthi imuli yakhe isesimeni esibi.
“Ngelanga sikwanisa ukudla ka 2 singapheka ekuseni sipheke lantambama senzela abantwana abancane…Kuhola abantu abadala kuphela ngapha thina asiholi abanye bayahola kodwa thina asiholi. Ku hola abantu abalutshwane kuphela it’s about 20 kuphela kulabantu abanengi abangena kuma thousand so liyabona ukusurviver kwakhona”
UNkosikazi Ndou uthi loba unina eseleminyaka yokuzalwa engamatshumi ayisithupha, 60, kuyamdanisa ukuthi intanga zakhe ziyahola kodwa yena akatholi lutho.
“Kulokukhethana khethana ukuth lowu hayi lowu yeah. Asazi kumbe sizahola kungabuya idonor oCaritas kumbe labanye. Maybe sizathola khonapho kuhola abe social Welfare yibo abatholayo kuphela. Siyacela kulabo abase msebenzi lemisebenzi yakhona ayitholakala yikho sihlezi ekhaya khonalapha, kulo sisi wami oyedwa osebenza e Beitbridge nguye osithengela ukudla Atleast angathi 50kg ngenyanga athi iflour lerice siyakhona ukuth si survive for the whole month.”
Esinye njalo isakhamuzi seMajini, ugogo Idah Nyamayawo uthi badla imbuya ngoluthi ngoba emzini wakhe kuhola umkakhe kuphela loba nje behlala beyisitshiyangalombili labantwana kanye labazukulu.
“Sipheka kanye ntambama kuphela thina, sidla ntambama ngoba imali ingekho, singathi sidle lase mini isitshwala imali yokuthenga ukudla siyayi thatha ngaphi. Ukuthi sipheke isitshwala emini njengakudala akusavumi, asikuyenzi ngoba ukupheka siyabe sikuthethe ngaphi ukudla kwakhona”
Isakhamuzi seBeitbridge
Abanye balabo abalutholayo usizo lukahulumende labo bakhala ngokuthi akwaneli ukudla lokhu. Omunye wabo nguMnu Khuphulani Muleya.
“Babethi bazabuya once a month since then batshabalala bebuzwa bathi amaregister akhona silawo kodwa asikazuzi iskaff kwathi last month mhlaka 10 babuya sebe le wheat igoroni (barely) kodwa ba apologiser ukuthi sebelanyanga ezingu4 bengabuyi ngakho sizanika ihousehold inye i50kg kulabo abalemuli ezinkulu”
Umsakazo weStudio 7 wethekelele njalo kuWard 6, lapho esithole khona uMnu Alifa Mbedzi, othi abaphila ngcono yilabo abalezihlobo eziphetsheya.
“Bayathola igrain from iGovernment but ayiso bonke kule limited number ekhethiweyo per sabhuku inikwe ukudla abanye babezphandele bemelele ukuth abantwanababo ukuth ma bekwanisa babasize but uma kungela mntwana kuyabe kunzima sibili”
Okwenza isimo sendlala sibe sibi ngamandla yikudula kwempahla etshiyeneyo, ikakhulu ukudla. Isaka lempuphu elilesisindo sama-kilogram alitshumi, i-10kg, eBeitbridge, belithengiswa ngama-dollar eMelika amane, US$4. Kodwa selikhuphukile laya kuma-dollar ayisithupha, US$6 kusiya kwayisikhombisa, US$7. Ugogo Idah Nyamayawo uthi ayitholakali imali.
Atsha amabele emasimini phose wonke eBeitbridge
"Ngamakhulu amabili yemali yeSouth Africa ukhona ukuthenga amazowe amabili kuphela lama biscuits ezitolo manje siyaphephela ngaphi uma kunje. Ukudla emini lantambama kuyabe kungavumi. Iyeast esiyifaka kuflour ingama rand ayi sithupha ipakethi elincane kuthi ama jiggies abantwana yisikhombisa ngeke siyithole imali yokuthenga impuphu elesisindo samakilogram angamatshumi amahlanu yona esibiza amakhulu amahlanu lamatshumi amahlanu imali yeSouth Afric.”
Umphathintambo wogatsha lukahulumende olubona ngenhlelo zokuphathisa abaswelayo, olweSocial Welfare, uMnu. July Moyo utshele iStudio 7 ukuthi lanxa bekhona abakhalayo ngokungaphiwa ukudla nguhulumende, sebephathise abantu bemaphandleni abedlula izigidi eziyisithupha, 6.1 million, ngokudla kunyanga ezintathu ezedluleyo.
Wengeze wathi osobhuku yibo ababhala abantu abadinga usizo lokudla njalo akula Ward emaphandleni abangafikanga khona.
"Sayenza iZimvac njalo sinika ukudla ngempumela esayithola lapho. Besilomumbu eBeitbridge uhle wanikwa abantu kundawo leyo okwenela inyanga ezintathu, sesizabanika okwesibili siqala ngenyanga kaNcwabanikazi sibanika njalo ukudla okwenela inyanga ezintathu. Njengoba ngitshilo sikhokhelwa ngokuvele kuZimvac kodwa sayengeza. Sesinike abantu abadlula abayinkulungwane eziyisithupha (6.1 million) emaphandleni ilizwe lonke lama ward wonke.
Inhlanganiso ephathisa abalambayo ngokudla emhlabeni jikelele eyeWorld Food Program ithi abantu abadinga usizo lokudla emaphandleni eZimbabwe okwamanje bayizigidi phose eziyisithupha, 5.9 million, kuthi emadolobheni bayizigidi phose ezimbili, 1.7 million.
Kusiyafika uMbimbitho womnyaka ozayo, uhulumende uthi abantu abayizigidi eziyisitshiyagalolunye, 9 million, bazadinga ukuphathiswa ngokudla njalo kufuneka imali yeMelika ephezu kwezigidi ezintathu, US$3.3 billion, yokuthenga lokhu kudla.
EleZimbabwe ngelinye lamazwe asemhlubulweni wezansi yezwekazi leAfrica ahlaselwe yindlala abalisa eleBotswana, Zambia, Malawi, eleNamibia leLesotho lapho inhlanganiso yeFewsNet ethi kulabantu abalambayo abaphezu kwezigidi ezingamatshumi amathathu, 30 million.
SEE ALSO:
Udaba Esilwethulelwe NguNgqwele Dube