Iqula elizakuyakhangela ukhetho lweZimbabwe luqhutshwa ele nhlanganiso yomamanyano wamazwe angezansi kwezwekazi leAfrica, eye Southern African Development Community SADC Electoral Observation Mission, lizafika elizweni ngoLwesihlanu, sokusele insukwana nje ukuthi luqhutshwe ukhetho.
UMongameli Hakainde Hichilema wakweleZambia, kusikhundla sakhe sokukhokhela uhlangothi lwe SADC, olubona ngezombusazwe, ezomvikela lokuthula, olwe SADC Organ on Politics, Defence, and Security, wethule umbiko lamuhla esithi iqula lokuyananza ukhetho kweleZimbabwe, ele SADC Electoral Observation Mission (SEOM), lizakhokhelwa ngowake wabangumsekeli kamongameli welizwe uDokotela Nevers Mumba ukuthi abengu.
Iqula leSADC lizabe liseZimbabwe kulandelwa inhloso yenhlanganiso le ukuthi kuqhutshwe ukhetho oluhambelana lezinqumo lezimiso zeSADC kumalunga wonke.
Amalunga awe SADC Electoral Observation Mission azabe efakwe ezigabeni zonke zeZimbabwe ukunanza ukuthi isimo elizweni siyabe sinjani, ngosuku lokhetho, ngaphambilini kokhetho kanye langemuva kokhetho.
Kodwa abacubungula ezombusazwe abafana lodokotela Zenzo Moyo bathi vele seliphuzile iqula leli ukuyafika eZimbabwe ngoba lingasoke libone konke okwenzeka elizweni ngaphambilini kokhetho.
“Leliqembu kumele liqale mhlaka 17 August, kubanika amalanga amahlanu ukuthi bakhangele ukhetho. Bayabona ukuvota, kukanti bekumele bekhangele insuku ezingaphambi kokhetho.”
UMoyo uthi ukhetho lolu luza ngesikhathi eleZimbabwe lisiyathatha isikhundla senhlanganiso ebona ngokuqhutshwa kokhetho eyeSADC Organ on Politics, Defence and Security.
Linguquko izakwenzakala emhlanganweni owe SADC Summit ozakwenzelwa edolobheni leLuanda, kwele Angola ngoLwesine, lapho inkokheli egoqela uMongameli Emmerson Mnangagwa eyabe ikhona.
“Angiboni ukuthi bazaqeda ukudla konke kusasa bathi ukhetho lolu belungakhululekanga. Emhlanganweni weAngola futhi iZimbabwe yiyo ethatha ubugcinisihlalo benhlanganiso yeOrgan on Politics, Defence and Security okuyiyo ekhangela ngokuqhutshwa kwama elections.”
Noma nje amazwe afana leBotswana le Zambia ake akhuza phezu kokhetho lweZimbabwe eminyakeni edluleyo, uMnunzana Gideon Musonda, wakwele Zambia, uthi abakhangelanga ukuthi iSADC Electoral Observation Mission ikhiphe umbiko ongahambelani lohulumende weZimbabwe phezu koku qhutshwa kokhetho.
“Asikhangelelanga okunengi kunhlanganiso ye SADC Electoral Observation Mission. Bazalandela nje lokhu okuyinhlalayenza, ngoba abangeke baphikisane leSADC.”
Kodwa okhokhela intsha yeZANU PF koBulawayo, uMnunzana Addington Mpofu, uthi bayemukela ngemjabulo iqula leSADC ukuthi lizozibonela mathupha ukuthi kulokuthula kangakanani eZimbabwe, ngaphambilini kokhetho.
“Lokhu kusibajulisa kakhulu ngoba kuzabapha ithuba ukuthi bazibonele okwenzakalayo. Njengoba umongameli esetshilo sifuna ukuthi Singabantu abathanda ukuthula. Akulangitsho lobudlwangu dlwangu obukhona.”
Kulokukhathazeka ngezehlakalo zobudlwangu dlwangu lodlakela kwezinye indawo zelizwe, okugoqela esigodlweni eHarare lapho okwabulawa elinye ilunga lebandla eliphikisayo ele Citizen Coalition for Change (CCC) ngabacatshangelwa ukuthi ngabe bandla leZANU PF.
EMasvingo kuyonale iviki abasekeli be CCC baphoselwe inthuthu ehitshayo ngamapholisa, ngesikhathi amabandla aphikisayo eqhubeka ekhala ngokuthi inkundla yokhetho kayilingani, igelezela kubandla elibusayo leZANU PF.
Umsekeli kanobhala obona ngendaba ezenzakala ezwekazi leAfrica, uNkosikazi Molly Phee, ukhuthaze uhulumende weZimbabwe ukuthi abone ukuthi ukhetho luqhutshwa ngokukhululekileyo, njalo athathe amanyathelo okuvimba izehlakalo zodlakela esezisanda elizweni jikelele.
Isiphathamandla sikahulumende oweZANU PF, uMnunzana George Charamba, utshele iphephandaba eleHerald ukuthi kulamanye amaqula avela phandle kwelizwe adinga ukuzophehla udlame lokudala isimo sokuxokozela, ukuze bacine besithi ukhetho belungakhululekanga.