Izakhamizi zakoBulawayo zamukele ngemibono ehlukeneyo uhlelo oluqhutshwa ngabekomishini ebona ngezokhetho eyeZimabwe Electoral Commission lokufundisa uzulu ngezokuvota, zisithi bezivele zilulindele beseluphuzile ngoba sekusele insuku eziphansi kwamaviki amabili ukuba luqhutshwe ukhetho lokudinga umongameli, amalunga edale lephalamende lamakhansila.
Inengi labantu bakoBulawayo bathi lanxa kukuhle ukuthi abeZEC baqhuba lolu hlelo njalo luqakathekile, udubo nje yikuthi solusenziwa isikhathi sesiphelile, sokungase nsuku zatshwala ukuthi ukhetho luqhutshwe elizweni.
Isakhamuzi sakoBulawayo, uMnu Fanuel Moyo uthi ukhangelele ukuba bafinyelele kuzo zonke indawo.
"Uhlelo olwenziwa yiZEC luhle njalo lusemthethweni kodwa ngingazi ukuthi bazenelisa ukufinyelela wonke umuntu ngoba insuku zokuphatha ukhetho sezisondele."
Lokhu kusekelwe nguNkosikazi Sibangani Nyathi kodwa ekhala ngokuthi uhlelo lolu luphuzile.
"Siyalwamukela uhlelo lweVoter Education kodwa baphuza ukuluqalisa."
Esinye isakhamuzi sakoBulawayo uNkosazana Nokuthula Mlotshwa uyalungcoma uhlelo lweZec.
"Siyabonga ukufundiswa ngohlelo lokuvota baqhubekele phambili ngalo luqakathekile."
UMnu Nkosilathi Mpofu oweZec ongomunye wabafundisa abantu ngezokhetho uthi amabizo abazavota ayabe ekhona endaweni zokuvotela kusukela mhlaka 11 kusiya mhlaka 12 Ncwabakazi.
"Ukuvota kuyaqala ekuseni Ngo 7am kuze kuyevalwa ngo 7pm ntambama. Umuntu kumele athwale isithupa sakhe seplastic kumbe esezenge kumbe ipassport evalid eyeZimbabwe uqonde epolling station uyevota. Two days before ukhetho amabizo enu ayabe ekhona lapho okuvotelwa khona. Ukhetho luyathatha usuku olulodwa sivotela ukhansila, ilunga ledale lephalamende lomongameli."
Uhlelo lwabeZEC lokufundisa uzulu ngokuvota lusekelwa yisisekelo sombuso selizwe kuSahluko 12 Section 238 njalo alulamigoqo njengokubhalisela ukuvota lezinye inhlelo zabeZEC. Inhlanganiso ezizimeleyo labalwela amalungelo oluntu labo isisekelo sombuso siyabapha imvumo yokufundisa abantu ngokhetho kodwa kumele baqale bathole imvumo yokwenza lokho kuZEC.
Forum