Abasakhulayo abakumabandla ezombusazwe azancintisa kukhetho lwalonyaka sebelobelane isivumelwano sokuba kube lokuthula elizweni ngesikhathi sokhetho.
Abasakhulayo laba bavele kumabandla alitshumi lanye agoqela eliphikisayo eleCCC lelibusayo ele ZANU PF bathi bazakwenza konke okusemandleni abo ukubona ukuba ukhetho lwalonyaka luqhutshwa ngokuthula.
Babuthaniswe eHarare yinhlanganiso ezimeleyo eye 4H Zimbabwe Foundation kulenkuthazo yokuba bengavumi ukusetshenziswa ngendlela eziphambana lomthetho nxa kuthe kwaba lokungazwisisani.
Ekhuluma kulumbuthano uNkosikazi Mercy Gonde owe 4 H Zimbabwe uthe benze isinqumo sokuba abatsha laba balobelane phansi isivumelwano sokulondoloza ukuthula ese Peace Pledge lesi ngoba kuyibo abavame ukusetshenziswa ngamabandla ezombusazwe ukwenza udlakela.
"Sifuna ukuba ukhetho lube lokuthula lokukhululeka kungela buqili. Sifisa ukukhuthaza ubudlelwano bomuntu wonke elizweni. Sifuna abatsha bawuse phambili lumsebenzi."
Omunye wabatsha abalobe igama kusivumelwano lesi nguMnu Thamsanqa Nyathi owebandla le Zimbabwe Coalition for Development elizancintisa phansi kuka Mnu Trust Chikohora kukhetho, othi uthemba ukuba isivumelwano lesi sizasebenza.
"Esikwenze namhla yikufunga ukuba abantu bavote belokuthula. Sikhangelele ukuthi ngesikhathi sokhetho kube lokubambana. Singababe Zimbabwe singakabi ngabamandla ezombusazwe."
Kodwa uMnu Womberaishe Nhende owebandla le CCC uthi ibandla lakhe liyethuselwa lokuhlukuluzwa lapho bekhankasela ukuthola usekelo lokuvotelwa kukhetho njalo uthemba ukuba lokhu kuzancedisa ukuvimba udlakela.
"Esikutholayo yikuthi elizweni lonke abanye bethu bayatshaywa. Sithemba lokhu kuzalungiswa. Njengabatsha yithi esenza udlakela. Kumele sikulungise lokhu."
Lokhu kuphikiswe ngu Mnu Mabutho Moyo owe ZANU PF.
"Laba sesidiniwe ngabo. Kibo akulanto enhle. Bayibona ukuthi sebezanqotshwa. Bayabona ukuthi abantu ababuthanela uMongameli sebedinga ukucatsha ngomunwe."
Abanye abakade besembuthanweni lo bagoqela ababesekeli bamabandla ezombusazwe lawezokholo, amapholisa, ingatsha zikahulumende lommeli wesigodlo se Switzerland sona esisekela uhlelo lolu.
Abanengi abakade bekulumbuthano baveze ithemba lokuba amabandla ezombusazwe azalandela izinqumo zokulondoloza ukhuthula njalo ziphunguke izehlakalo zodlakela elizweni ngaphambilini kokhetho langemuva kwalo
Kusenjalo, izinduna ze Zimbabwe namhlanje zikhethe induna uMtshane Khumalo ukuba abe ngu Mongameli we dale le Chiefs Council esekelwa ngowayengu Mongameli induna uFortune Charumbira.
Ekhuluma lentathelizindaba uKhumalo uthe bazazama ngazo zonke indlela ukuba bengakhethwa balandele umthetho welizwe.
"Sizaqhubekela phambili sincedisana. Siyathandaza ukuba ama Senators abuye. Sifuna ukukhangela umthetho wethu owe Traditional Leaders Act ukuba uhambelane lalokho okukusisekelo sombuso"
Ukukhethwa kwababili laba kutsho ukuba bazahlangana lanye abalitshumi lasithupha- 16 abazakhethwa mhlaka 24 Ncwabakazi ukuba babe kudale le Senate bemele izinduna.
Forum