Sokusele insuku ezilitshumi lanye kuphela, ukuthi ukhetho luqhutshwe eZimbabwe, iqhubekela phambili ngalimpelasonto imihlangano yamabandla ehlukeneyo ezombusazwe yokukhankasela usekelo lokuvotelwa kukhetho, luka mhlaka 23 ncwabakazi.
NgoMgqibelo uMongameli Emmerson Mnangagwa ubesemangweni oweGoora eMadziva, esabelweni se Mashonaland Central, ehlangana lamakholwa ebandla lokholo lwesipositoli, ele Johane Masowe Vadzidzi vaJesu.
Osaphethe isikhundla sikamqondisi obona ngokwethulwa kwemibiko ku-Zanu PF, umnumzana Farai Marapira utshele iStudio 7 ukuthi uMnangagwa ugcizelele kunkuthazo yakhe yokuthi abamabandla ezombusazwe akhankase ngokuthula angaphehli udlakela endaweni lapho aqhuba khona imihlangano yokukhankasa.
Umkhokheli webandla eliphikisayo ele CCC, umnumzana Nelson Chamisa yena ukhangelelwe ukuba lomhlangano omkhulu oweStar Rally enkundleni yeMamutse Stadium eMasvingo, NgeSonto, wokukhankasela ukudinga usekekelo kukhetho.
NgoMgqibelo abeCCC, bebelomhlangano wokwethula amalunga akade esefuna ukuvinjwa ukuncintisa kukhetho lwalonyaka emzini oweNkulumane.
I Studio ibe lethuba lokuxoxa lomsekeli wesikhulumi saleli bandla umnumzana Ostallos Siziba ochasisa kabanzi ngomhlangano waNgoMgqibelo, “Umhlangano waseNkulumane ubu jonge ukwethulela umpakathi amaCandidates ethu abanzintisa kukhansili lezikhundleni zedale lephalamende.”
Forum