UMnu. Donald Trump ugcotshwe ngoMvulo ukuba ngumongameli weMelika phakathi kwesakhiwo seCongress ngenxa yamakhaza eWashington DC.
Ekhuluma esanda kugcotshwa eCapitol Hill Rotunda, uTrump ongumongameli wamatshumi amane lasikhombisa – 47, uthembise ukulungisa konke athi koniwa libandla leDemocratic Party elikhokhelwa nguMnu. Joe Biden, obengumongameli kusukela ngomnyaka ka2021.
Kuqhutshelwane umbuso ngokuthula kungelabantu abatshengisela phandle kwedale leCongress njengalokhu okwenzakala kugcotshwa uBiden. Abalandeli baka Trump bazama ukumisa ukubalwa kwama electoral votes mhlaka 6 Zibandlela besithi ibandla lama Democrats laliqilibezele kukhetho lukamongameli.
NgoMvulo uTrump uthe konke lokhu akusoze kwenzakale esembusweni njalo ufisa ukulungisa imingcele athi ingenwa yizidlova labantu abangaqedakaliyo.
Wethule imithetho yakhe efika phose itshumi lanhlanu athi izaqala ukusebenza khonamanje. Imithetho le igoqela ukuxolela abangena ngenkani edale leCongress bezama ukuvimba ukubalwa kwama electoral votes.
Okunye njalo uthi uzakwethula kusihlwa imithetho yokuthengiselana, eyokucongolozela amafutha ezimota lamanye duzane lolwandle, ukumisa uhlelo lwezimota ezisebenzisa umlilo kagetsi, eyokulungisa uhulumende, eyokukhuthaza ukukhuluma kwabantu bekhululekile njalo lokuthi kube labesifazana labesilisa kuphela eMelika.
UTrump uthe kuzakuba lomthetho okubopha izigangi ezivela kwamanye amazwe, owokubisela umkhandlo wePanama Canal ezandleni zeMelika lokunye.
Uthe, “Ilizwe leMelika elilegolide liqala namuhla. Kusukela khonamanje eleMelika kalisoze libhidlike. Sizalikhokhela ukwenzela ukuba libe kuzinga eliphezulu. Akulaphupho elizasehlula. Kasisoze sidele. Asisose sibuyele emuva.
“Ngibuyela umbusweni ngikwazi mhlophe ukuthi sizaphumelela. Kulengunquko emangalisayo elizweni lonke jikelele. Ngifisa ukutshela abantu bonke ukuthi lesi yisikhathi sokuthi sibelezibindi, sihambe phambili ngamandla ukwenzela ukuba sithuthuke kakhulu.”
UTrump oleminyaka yokuzalwa engamatshumi ayisikhombisa lasitshiyangalombili – 78 ungumongameli wesibili ongene ewofisini le kungalandelani iminyaka. Omunye njalo kwaba nguGrover Cleveland ngama 1890s. UTrump wanqoba obengumsekeli kamongameli uNkosikazi Kamala Harris kukhetho olwaqhutshwa ngoLwezi nyakenye.
Umongameli omutsha, umkakhe uNkosikazi Melania Trump, umsekeli wakhe uMnu. JD Vance lemuli zabo baqale umkhosi wokugcotshwa kwabo ekuseni ngokuya enkozweni eSt. John’s Episcopal Church duzane leWhite House. Besuka lapho bahambe eWhite House ukuyanatha itiye loBiden lomkakhe uNkosikazi Jill Biden bengakayi edale leCongress lapho agcotshwe khona.
UTrump ngumongameli wakuqala ukungena ewofisini esekhulile njalo uVance ngomunye wabatsha abathathu asebengene ewofisini yomsekeli kamongameli.
Ungumongameli wakuqala ongene esikhundleni lesi owatholakala elecala. Watholakala elamacala angamatshumi amathathu lane – 34 okuphekapheka ingwalo zamabhizimusi ukwenzela ukuthola izikwelede njalo lokuhlawula umakhwapheni uStormy Daniels inkulungwane ezilikhulu lamatshumi amathathu - $130,000 eyesivalamlomo ngesikhathi eleMelika liqhuba ukhetho.
Icala lokuthi wazama ukugengula impumela yokhetho ngo2020 lalahlwa ngoba wayesekhethwe ukuba ngumongameli.
Bekulabantu abanothileyo abagoqela uMnu. Jeff Bezos wenkampani yeAmazon, Mark Zuckerberg (Meya), Elon Musk (Tesla, X), Shou Zi Chew (TikTok) labanye abathakazelela uTrump emkhosini wokugcotshwa kuka Trump okwenzelwe eCapitol Rotunda ngenxa yamakhaza amangalisayo.
Abanye njalo abahambe emkhosini lo ngumsekeli kamongameli wakweleChina uMnu. Han Zheng, umkhokheli wakweleItaly uMnu. Giorgia Meloni, umkhokheli weArgentina uMnu. Javier Milei lomkhokheli wakweleEcuafor uMnu. Daniel Noboa.
Abake baphatha isikhundle sikamongameli abahambe ekhosini lo nguMnu. Bill Clinton lomkakhe, uMnu. George W. Bush lomkakhe loMnu. Barack Obama.
UTrump obekhangelelwe ukuba esuka eCapitol Hill uzakuya eCapitol One Arena ukuyahlola ibutho lokunye.
Forum