Abakunhlanganiso ezizimeleyo bathi sebelinde ngamehlo abomvu ukugcotshwa ngoMvulo kukaMnumzana Donald Trump ukuba ngumongameli weMelika.
UTrump okhokhela ibandla leRepublican Party wanqoba umsekeli kamongameli uNkosikazi Kamala Harris webandla ebelibusa eleDemocratic Party kukhetho olwaqhutshwa ngoLwezi.
Omunye wabaxoxe leStudio 7 ngodaba lolu nguMnumzana Kelvin Moyo okunhlanganiso yeVictoria Falls Combined Residents’ Association.
“IAmerica ikhulile entweni zama foreign policies loba yikuliphi ibandla so akukho okunengi esibona kuzatshintsha esikubongayo kumbe engikuloyisayo yikuthi ungani ufuna ukubisa ubuntu ebantwini njalo sifundile ukuba nxa kulebandla eliphisayo, i transition kumele ihambe njani.”
UNcube uthi phezu kwalokhu, ubona uhulumende weMelika engafisa ukusebenzisana leZimbabwe kwezamabhizinisi.
“UTrump uyakholelwa kubosamabhizinisi ukuthi kakusetshenzwe ngakho sengafuna ukusebenzisana lele Zimbabwe. Kwezokhetho iMelika iyavota ama results aphume madinyane, yinto eqakathekileyo njalo labaphikissayo bakwrnza ngokuthula, abasezihlalweni kabangeneli ngokokhetho lube free and fair.”
Kulabathandabuza ukuba uTrump uzasebenza kahle lamazwe akuzwekazi leAfrica kulandela akwenza esesesikhundleni sikamongameli. UMnumzana Effie Dlela Ncube wesigabeni seNkayi, okhokhela njalo inhlanganiso yabathengi eyeNational Consumer Rights Association, uthi kaboni usizo lokwelulwa kwengalo nguhulumende weMelika kwamanye amazwe luqhubekela phambili.
“Ukungena kukaMnumzana uTrump kuzaletha inguquko enkulu kweleZimbabwe ikakhulu kwezosizo ngoba yena akakholelwa lalaba ahamba labo ukuba amazwe la kufanelwe ancediswe ngezezimali ngakho kuzaphungulwa i-aid okuzayithinta iZimbabwe layo.”
UMnumzana Trymore Ndolo ohola inhlanganiso elwela ilungelo labantwana labesifazne, eyePathways Women Empowerment and Girl Child Support Network, uthi abakufisayo yikuba uTrump esule izijeziso zenotho okukhanya engani zetheswa eleZimbabwe.
“Kumele bakhuphe ama sanctions ngoba awaphambanisi uhulumende, kodwa aphambanisa uzulu. Isikhathi sesiside sikuka sanctions and ahlupha uzulu.”
UNdolo uthi kakhulumi lapha ngezijeziso zenotho ezetheswa abacatshangelwa ukuba zetheswa labo abenza ukukhohlakalo lokwephula ilungelo loluntu.
“Kulama individual sanctions lawana aphezukwethu ngeke sibakhulumele njengezakhamizi.”
UMongameli Emmerson Mnangagwa labanye bemuli yakhe kanye lezinye iziphathamandla zebandla elibusayo eleZanu PF, betheswa izijeziso lezi ngeleMelika. Ukuhlaziya ukugcotshwa kuka Trump kulandela ukhetho olwaqhutshwa nyakenye, sixoxe njalo loMnu. Rejoice Ngwenya okunhlanganiso yeCommon Market for Liberal Solutions.
“Kusinika umvuzo wokuthi sibone ukuthi amandla ombuso welizwe ayaguqulwa ngokuthula. Akulakuxababa phakathi kwebandla leli lelama Democrats lokhu kusitshengisa ukuthi uzulu uhlala edinga yona inguquko phinde nxa umongameli sephelelwa ngamacebo, akuyangisi ukuphuma esihlalweni sombuso.”
Kuqhutshwa ukhetho phakathi kweminyaka emine kweleMelika okuvame ukunqoba ibandla lamaRepublicans kumbe elama Democrats. Okwamanje elema Republicans lizibambe esidukwini.
Forum