WASHINGTON - Ozancintisa kukhetho lukamongameli ezimele, uMnu. Saviour Kasukuwere, uthi kazange asebenzise amajaha lamantombazana ayesaziwa ngokuthi ngama 'Green Bombers', ayetshaya njalo ebulala abaphikisa uhulumende webandla leZanu PF, ngesikhathi sokhetho eZimbabwe.
UKasukuwere, oncintisa ukhetho lolu ezimele, utshele umsakazo weStudio 7 ukuba ngamanga aluhlaza tshoko ukuthi walolonga kumbe wafaka empakathini abantu laba, abaziwa ngokuthwalisa nzima uzulu.
“Ngangizaba ngumbulali njani? Yindaba konke lokhu kuphoselwa kimi. Yindaba? Loba kunjalo, ngangena nini kuhulumende njalo ngangena njani esikhundleni somphathintambo kahulumende? Ngaphatha ziphi ezinye izikhundla? Kulobufakazi na obuveza ukuba ngathwalisa nzima njalo ngabulala abantu? Walubona uphenyo olwenziwa nguDewa Mavhinga phansi kwenhlanganiso yeHuman Rights Watch? Igama lami likhona na kugwalo lolu? Bayaziwa abantu abenza lokhu okhuluma ngakho.”
Uphinde wathi enganqoba uzasebenza labamabandla atshiyeneyo ukuze kuthuthukiswe eleZimbabwe.
Uthi wokumele kulungiswe konke eZimbabwe ukuze abantu badlelane kahle, bathuthukise ilizwe. Ngathi ngisuka ekhaya kwahlaselwa indlu yami mina nginga dubuli muntu. Asikhohlwani ngokwakudala. Kumele silungise okwenzakala ngomnyaka ka2017 ukuze ilizwe lethu lithuthuke.
UMnu. Nhlanhla Moses Ncube, unobhala jikelele wenhlanganiso yeFreedom Alliance, uthi uKasukuwere kumele akhulume iqiniso ngakwenza esesekuhlangothi lukahulumende olubona ngezabatsha.
Forum