Inani labantu abafuna ukuncintisa kukhetho lokudinga umongameli weZimbabwe, libikwa lilakho ukukhuphuka ngemva kokuba ikhomishini ebona ngezokhetho eyeZimbabwe Electoral Commission (ZEC) isiyengeze isikhathi sokuthi labo ababhekane lobunzima bokubhadala imali yonke ebifunakala ngoLwesithathu benelise ukulungisa amaphutha asemaphephani abo kanye lokuhlawula imali efunakalayho.
Lokhu kuza ngesikhathi abantu abanengi abakade befuna ukubhalisa ukuncintisa kukhetho behlulekile ukubhadala ngenxa yemitshina ebe ingasebenzi emadale awe nomination court.
Isaziso esethulwe yisiphathamandla seZEC, uMnumzana Utoile Silaigwana, uthe abantu laba bacine bephiwa elinye ithuba lokuqeliselwa isikhathi namhlanje ukuze balungisise obe kudingakala abangakenelisanga izolo kusiya fika ihola lesine emini yantambama namhlanje. IZEC ithi iyenze lokhu ukuze labo abafuna ukuncintisa kukhetho bangene kukhetho kungelani lokuba basuka kuwaphi amabandla.
Umkhokheli webandla leLabour, Economists and African Democrats, uNkosikazi Linda Masarira, ngomunye wabancedakale ngokuqeliswa kwesikhathi sokuthi abantu babhadalele ukubhalisa.
"Sizathatha ithuba leli ukuba sibhalise ukuthi sincintise kukhetho luka mongameli welizwe. Siyathaba ngenyathelo elithethwe yiZEC.”
Isikhulumeli sebandla eliphikisayo eleMDC-T, uMnumzana Witness Dube uthi bona babelohlupho lokuthola imali emabhanga.
"Njengebandla leMDC-T sizama ukuba sigijime siyebhalisa amabizo alabo esehluleke ukubabhalisa izolo. Imali yethu silayo kodwa ngenxa yendubo zemabhanga besehlulekile ukubhalisa amabizo onke izolo."
Ibandla leZANU PF lithi selinqobe endaweni ezilitshumi lantathu- 53 kuma wards kumbiko eliyithole kubameli bayo endaweni zonke zelizwe ngoba amabandla aphikisayo engazange afake abantu abancintisayo kulezo ndawo.
Lokhu kubikwe ngumqoqi womsebenzi kubandla leli uMnu. Mike Bimha.
"Sesinqobe endaweni ezifika 53 elizweni lonke njengebandla elibusayo. Kusobala ukuba ibandla lethu lizanqoba kukhetho kungelambuzo."
Imizamo yokukhuluma labe CCC yehlule ngoba iziphathamandla ze bandla leli abafana loNkosikazi Elllen Shiriyedenga, umnumzana Gift Sizaba, uNkosazana Fadzayo Mahere lo Mnu. Nelson Chamisa bebengaphenduli umakhalekhukhwini.
Ingcitshi kwezombusazwe, uMnu. Bekezela Gumbo, uthi amabandla aphikisayo alomsebenzi ozwayo ukuthi banqobe kukhetho.
"Kuzamele bezabe ukuba basebenze endaweni lapho abazakala khona ukuze banqobe kukhetho lwalonyaka. Lokhu kumele bakwenze bengakhangeli lapho abanqotshwe khona.”
Okwakhathesi abantu asebenelisile ukubhasalisa ukuze bancintise kukhetho lokudinga uMongameli welizwe, ngabathi uMongameli Emmerson Mnangagwa owe ZANU PF, uMnu Nelson Chamisa owe CCC, uMnu Douglas Mwonzora owe MDC-T, uMnu Lovemore Madhuku owe NCA, uMnu Trust Chikohora owe Zimbabwe Coalition for Peace and Development, uMnu Saviour Kasukuwere ozimeleyo, lo Mnu Joseph Busha owe FreeZim Congress.
Kusenjalo, idale leNomination Court liqhube umsebenzi walo ngokuthula kusukela izolo kuze kube lamuhla, eLarge City Hall lapho obekubhalisela khona labo abafisa ukuncintisa kukhetho lokudinga amakhansila lasemthethwandaba kaMantshi oweTredgold Magistrate Court lapho obekubhalisela abafisa ukuncintisa ezikhundleni zokuba ngamalunga edale lephalamende.
Abesifazana abamela amabandla ezombusazwe ehlukeneyo aveze imibono ehlukeneyo ngokwenelisa ukuphanyeka amaphepha abo ukuthi bancintise kukhetho lwalonyaka oluqhutshwa mhlaka 23 Ncwabakazi.
Forum