BULAWAYO - Abazamela amabandla atshiyeneyo namuhla bafake amaphepha abo eNomination Court ngesikhathi kulungiselelwa ukhetho oluzaqhutshwa ngoNcwabakazi lonyaka.
Abanye abahambise amaphepha abo emthethwandaba namuhla bagoqela uMongameli Emmerson Mnangagwa, uMnu. Nelson Chamisa labanye abambalwa.
UMnangagwa wethekelele edale leNomination Court lapho atshele intathelizindaba ukuba eleZimbabwe lizaqhuba ukhetho olukhululekileyo lonyaka.
UMnu. Nelson Chamisa, umkhokheli webandla leCitizens Coalition for Change, laye ubesemthethwandaba weNomination Court.
UChamisa uthe ukhangelele ukuba uzanqoba kukhetho oluzayo.
Kulabanye njalo abaphanyeke amaphepha abo eHigh Court eHarare. Bagoqela uMnu. Lovemore Madhuku, owebandla leNational Constitutional Assembly, uMnu. Gwinyai Muzorewa owebandla leUnited African National Council, uMnu. Douglas Mwonzora owebandla leMDC-T, ozimeleyo uMnu. Saviour Kasukuwere, uMnu. Harry Peter Wilson okhokhela iZimbabwe Opposition Party labanye.
KoBulawayo, obekumele ancintise ukhetho lukamongameli, uMnu. Innocent Ndibali, okubandla leEconomic Freedom Fighters, uzangena kukhetho lwamalunga edale lephalamende.
Bekuyisiphithi emithethwandaba yokubhalisa labo abafisa ukuncintisa kukhetho lwalonyaka bemmele amabandla abo ezombusazwe kumaNomination Courts lendaweni ezitshiyeneyo zelizwe.
Abantu abedlula abayisikhombisa babikwa bebhalisile namhlanje befuna ukuncintisa kukhetho lokudinga umongameli welizwe. Kodwa kubikwa kube lokuxokozela ezigabeni ezitshyeneyo zelizwe lapho kubhalisa labo abafuna ukuncintisa ukuba ngamalunga edale lephalamende okucine kubangela ukuthi abanye bakhethe ukubhalisa bezimele, bengela mabandla ezombusazwe abawamelayo.
Abafuna ukumela amabandla abo ezombusazwe babuye ngobunengi koBulawayo ukuzofaka amaphepha lembhadalo yokuthi benelise ukuncintisa kukhetho lwama harmonised elections, olwenziwa mhlaka 23 Ncwabakazi.
Umphathintambo wezemali uProfessor Mthuli Ncube yena ufake amaphepha akhe emele ibandla leZanu PF elokitshini leCowdray Park koBulawayo.
“Namuhla ngizofaka amaphepha ami kunomination court. Lokho vele mele kwenziwe nxa kuyikuthi umuntu uzafuna ukuthi angene kukhetho. Abantu bangimelele nje ukuthi ngizosebenza labo. Yindawo esalele emuva kakhulu efuna idevelopment, mina vele ngingumuntu we development vele sengiqalisile kuthi imigwaqo kuthi amanzi amagetsi lokunye okinjalo owifi laba for iyouth ukuthi kube le digital connectivity.”
Bekukhangelelwe ukuthi uNcube uzancinthisana loThokozani Khuphe oweCitizen Coalition for Change kodwa seza ncithisama losakhulayo, uMnu. Pasor Sibanda, eCowdray Park.
“Nxa sisuka lapha amaphepha esengenile akusamiwa. Sesingena eground sigijima sokukhankaswa iCowdraypark isiphele ...... Ngazalelwa ngakhulela eCowdray park so ngiyakwazi okifunakalayo njalo ngingumfana omncane osakwanisa ukugijima.”
Ibandla le Zapu lalo liyancinthisa kulolu khetho. UMnu Trust Mkhwananzi ngowe Zapu ofuna ukumela iPumula yena ebesebotshiwe eqeda ukufaka amaphepha akhe
“Ngithe ngiqeda ukufaka amaphepha ngasengisiya hlala phansi sengisiyalinde iprocess yabo. Kwasokusiba lojaha omunye ohlala eceleni kwami lapha, ngasengithi kangiphe icontacts zakhe wasebhala icontacts zakhe ephepheni mina ngasengimnyenyezela ukuthi nginguTrust Mkwananzi ngisenzela ukuthi nxa sengimfonela enganitshwa.”
Ugogo uSanelisiwe Tshuma ubefakwe ukuthi amele iCCC njengo Senator kodwa bamvimba ukuthi angene. Uzonde okwamagama
Abanye abebandla leCCC kusenate lakuPR amaphepha abo ebengakavunyelwa ukufakwa ngoba kuthiwa aphuzile.
EMasvingo Urban kubikwa kuke kwaphoselana aqatha phakathi kwabasekela uMeya walelo dolobho owebandla leCCC, uMnu. Collen Maboke, labasekela igqwetha elilwela amalungelo oluntu uMnu. Martin Mureri webandla linye onguye olosekelo lwebandla ukuthi ancintise elimele.
UMaboke ucine ekhetha ukuncintisa ezimele.
EChinhoyi, abasekeli beZanu-PF babikwa labo bake bahluphana sebefuna ukuvimba abanye abakhethwa libandla besithi kababafuni.
Idale leNenomination Court lihlale ezigoabeni zonke zelizwe namhlanje.
Okwamanje akukaziwa ukuthi izozala nkomoni njengoba kulabanengi abakade belokhu bengekenelisi indingeko zonke zokubhalisa besabhekana lobunzima obugoqela ukusilela kwembadalo lokunye.
Forum