WASHINGTON DC – Kulomsekeli weZanu PF osekhweze isicelo eHigh Court esokuthi linkantolo ivimbe owake waba yisiphathamandla salelibandla uMnu Savior Kasukuwere ukuncintisa kukhetho lokudinga uMongameli welizwe ngoba esithi ibizo lakhe alikho kuluhlu lwabantu abalelungelo lokuvota olwe-voters’ roll.
Inkundla yeZimLive ibika ukuba umamangala, uMnu Lovedale Mangwana, ufuna uKasukuwere aliswe ukuncintisa ngoba esithi uhlale isikhathi esedlula umnyaka olengxenye, 18 months, ephandle kwelizwe, khona athi kumemuka ilungelo lokuphatheka kukhetho phansi komthetho weElectroal Act.
Kodwa igqwetha likaKasukuwere lithi imizamo le ayisoze iphumelele.
UKasukuwere uhlala kweleSouth Africa lapho afohla wabalekela khona ngesikhathi amabutho egenqula uhulumende kamuyi uRobert Mugabe ngo2017.
Kodwa useke waphenduka eZimbabwe wamiswa lasenkantolo esetheswa amacala khepha wafunyanwa emsulwa.
UKasukuwere ungomunye wabantu abalitshumi lanye, 11, ababhalisele ukuncintisa kukhetho lukaMongameli abagoqela uMongameli Emmerson Mnangagwa oweZanu PF lomkhokheli weCCC uMnu Nelson Chamisa.
Ibandla leZanu PF likhanya lizama ngazo zonke indlela ukumvimba nanku leziphathamandla zalo zithi uzabotshwa engavele elugxobe eZimbabwe ngoba elamacala ameleleyo awadala ngesikhathi engumphathintambo kuhulumende kaMugabe.
Olandela ezombusazwe njalo elwela amalungelo oluntu uMnu Difa Dube uthi imizamo yokubopha uKasukuwere lokucele idale leHigh Court ukuthi limalise ukuncintisa iveza sobala ukuthi inkokheli yeZanu PF iyaqhaqhazela.
Forum