Umeli weSunningdale edale lephalamende, okubandla eliphikisayo eleCitizens Coalition for Change (CCC), uNkosazana Maureen Kademaunga, ubotshwe eHarare ngoLwesibili esetheswa icala lokuzama ukubulala umuntu lokutshisa imota ngesikhathi sokhetho.
Igqwetha elimele uKademaunga, uMnu. Darlington Marange, okunhlanganiso yamagqwetha alwela ilungelo loluntu eyeZimbabwe Human Rights NGO Forum, uthi uKademaunga ubotshwe lamalunga amabili awebandla leCCC lawo awetheswa icala lokuzama ukutshisa imota lowayencintisa kukhetho lwamalunga edale lephalamende eSunningdale emele iZanu PF. UMarange uthi abathathu laba bazamiswa emthethwandaba kusasa.
UMnu. Gift Ostallos Siziba, umsekeli wesikhulumeli sebandla leCCC, uthi amapholisa abophe uNkosazana Kademaunga athunywe ngabaphathintambo bebandla leZanu PF.
“Kusobala kithi ukuthi, its political persecution, yikungasetshenziswa kuhle komthetho lamapholisa yiZanu-PF, ukuthi kubotshwe bonke ababephikisana labo.”
Isikhulumeli sebandla leZanu-PF, uMnumzana Farai Marapira, uthi amapholisa kumele avunyelwe ukuqhuba umsebenzi wawo engaphazanyiswa ngabezombusazwe.
"Amapholisa aqhuba umsebenzi wawo nxa kulecala elimangaliweyo. AbeCCC njengabantu abathi bamela uzibuse lokuvikela amalunga oluntu kufanele babe yibo abaphambili ekukhuthazeni abantu babo ukuthi bengahambi betshaya abantu. UHon. Barbara Rwodzi wahlaselwa wangena esibhedlela, singakhangela eSunningdale, ukhansila wangena esibhedlela, imota yakhe yatshiswa abanye batshaywa.”
Ingcwethi ecubungula ezombusazwe lezomnotho, uMnumzana Effort Dlela Ncube, owenhlanganiso emela amalungelo abathengi eyeNational Consumer Rights Association, uthi umthetho weZimbabwe kumele usebenze ungakhethi muntu.
“Lokhu kuveza ukuthi ukhetho lolu alutshintshanga lutho, ilizwe lilokhu liyilelana elakudala elingahloniphi imithetho labantu njalo lingamukeli imibono yabanye.”
Isikhulumeli samapholisa uAssistant Commissioner Paul Nyathi ukhuphe umbiko esithi sebebophe uKademaunga, Clayd Mashozhera lo Daudi Jessub besetheswa icala lokufuna ukubulala umuntu Kanye lokubhidliza impahla. Abathathu laba kubikwa bahlasela abantu abathathu mhlaka 23 Ncwabakazi lonyaka batshisa imota yohlobo lweToyota Spacio.
Abathathu laba kubikwa babesebenzisa imota kaNkosikazi Kademaunga, lezinye ezimbili ezingakaziwa ukuthi ngezabobani.
Kodwa abaphikisayo bathi ababoni abebandla elibusayo eleZanu PF bebotshwa lapho abadala khona amacala okuhlukuluza, ukutshaya lokuthumba amalunga ebandla labo. Inhlanganiso yeUnited Nations yakhuthaza uhulumende ukuthi ahlolisise udaba lokuncindezelwa kwabebandla eliphikisayo.
Elinye ilunga lebandla leCCC, uMnumzana Job Sikhala uselenyanga ezilitshumi lanhlanu esejele kodwa engatholakalanga elecala njalo encitshwa ithuba lokukhupha imali yesibambiso.
Your browser doesn’t support HTML5
Udaba lokubotshwa kukaNkosikazi Kademaunga oweCCC