Ibandla leZanu PF lithi abakubandla eliphikisayo eleCitizens Coalition for Change (CCC) kumele bekhohlwe ngezokhetho kuze kuyefika umnyaka ka2028.
Amalunga ebandla elibusayo athi uhulumende kaMongameli Emmerson Mnangagwa walandela imithetho yelizwe ngokuqhuba ukhetho lonyaka njengalokhu okumunyethwe yisisekelo sombuso welizwe.
Athi bayaziyenga abathi kuzakuba lokhetho oluzakhokhelwa yinhlanganiso yeSouther African Development Community, eyachothoza indlela okwaqhutshwa ngayo ukhetho mhlaka 23 Ncwabakazi lonyaka.
UMnu. Tafadzwa Mugwadi, obephethe isikhundla somqondisi wokwethulwa kwemibiko kubandla leZanu PF, uthi iSADC kayilamandla okuqhuba ukhetho olutsha eZimbabwe lonyaka.
Kodwa uMnu. Promise Mkhwanazi, ophethe okwamanje isikhundla sesikhulumeli sebandla leCCC, uthi bazaqhubekela phambili bekhala ngokhetho olusanda kwenziwa njalo lixoxisana leSADC ngempumela yokhetho lolu.
UMnu. Mkhwananzi uthi balethemba lokuthi iSADC izathatha isinqumo sokuthi kumele luphindwe ukhetho lwe-Zimbabwe.
Inhlanganiso le, leye European Union kanye leAfrican Union zakubeka sobala ukuba ukhetho lweZimbabwe aluqhutshwanga ngemfanelo.
Forum