UMongameli Emmerson Mnangagwa ngoLwesihlanu ubuyisele uMnu Kembo Mohadi esikhundleni sokuba ngomunye wabasekeli bakhe kuhulumende njalo wafungiswa ukuqala umsebenzi lomunye wakhe uMnu Constantino Chiwenga.
UMohadi wehle esikhundleni lesi eminyakeni emibili edluleyo ngemva kokuchaywa yinkundla yeZimLive ukuthi wayesiya emacansini lamakhosikazi amanengi agoqela awabanikazi.
UMohadi loChiwenga bafungiselwe eState House ngumahluli omkhulu, uChief Justice Luke Malaba phambi kukaMnangagwa.
Ababili laba batshele intathelizindaba emkhosini lo ukuthi babonga uzulu owakhetha ibandla leZanu PF walibuyisela embusweni lanxa nje ibandla eliphikisayo eleCCC kanye labenhlanganiso ezahlola ukhetho ezifana leAfrican Union leSadc, besithi ukhetho aluqhutshwanga kuhle.
UChiwenga uthembise ukuthi uzosebenzela intuthuko esithi, “Uzulu weZimbabwe kumele asuse umoya wokuzizonda, ukulimaza isizwe sakhe, kumele sibambisane. Singehlukana ngemibono yethu kodwa akumelanga sehlukane njengabantu baseZimbabwe.”
LoMohadi laye uthembise okufanayo.
“Silenjongo yethu esiyibeke eceleni mayelana ngezentuthuko," kutsho uMohadi. "Silombono wangempela okumele siwugcwalise, ngaphansi kwalowombono silamanyathelo kumbe amasu esesiwathethe ukuze siwufinyelele umbono ka-2030.”
Isikhulumeli sebandla leCCC uMnu Promise Mkhwananzi uthi kuyayangisa ukubuyiselwa kukaMohadi esikhundleni somsekeli kaMongameli lanxa wenza ubutshapha kuhlandla lakaqala lombuso kaMnangagwa.
“Yikho esephendukise uMohadi loChiwenga, akulanto abazambuza yona, akulanto abazayenza, akulanto abayaziyo. Bayabe bekhona nje bezidlela bekhemuza ilizwe lihlupheka," kutsho uMkhwananzi.
"I-SADC isebenza gadalala ukuthi ilungisise izinto eZimbabwe, abantu bengalahli ithemba. Lobu ubukhokheli bukaMnangagwa abukho emthethweni njalo akulanto obuzasinika yona.”
Iskhulumeli seZanu PF uMnu Farai Marapira kaphendulanga imibuzo esimthumele yona ngodaba lukaMohadi.
Bakhona abezinye inhlangothi zempilo abathi ukugcotshwa kukaMnu Mohadi loChiwenga yikwephula isisekelo sombuso, sona ezikhuthaza ukulinganiswa kwamathuba phakathi kwabesilisa labesifazane njengalokho okumunyethwe kuzigaba 17, 56 kanye lo-80.
Izigaba lezi zikhuthaza ukuthuthukiswa lokulinganiswa kwamathuba phakathi kwabesilisa labesifazane lapho kubekwa abantu ezikhundleni kungatsha zonke zikahulumende lakunhlangothi zakhe okugoqela lamankampani aphansi kwakhe ama-parastatals.
Ngalesi sizatho, umkhokheli webandla eliphikisayo eleLabour Economists and Afrikan Democrats (LEAD) uNkosazana Linda Masrira usola uMnangagwa esithi ngokwehluleka ukukhetha omunye wabasekeli bakhe ongowesifazana, wephule isisekelo sombuso welizwe.
“Sifuna nje ukuthi kube lowesifazane oyedwa oba ngumsekeli kaMongameli," kutsho uNkosikazi Masarira. "Awukho umbuso kazulu ngaphandle kwabesifazana.”
Ingcwethi ecubungula ezombusazwe, oyisiphathamandla senhlanganiso yeZimbabwe Democracy Institute, uMnu. Bekezela Gumbo uthi esinye sezizatho zokubuyiselwa kukaMohadi, yikuthi uMnangagwa ufuna ukugcwalisa isivumelwano somanyano esenziwa phakathi kwePF Zapu leZanu.
Uthe, “Ubengeke alahle uMohadi ngenxa yokuthi uMohadi ungene etikitini leZapu, ama-War Veterans wonke la agcweleyo, ama-ex Zipra agcweleyo elizweni eMatebeleland leMashonaland leMidlands amelwe nguKembo Mohadi."
"Usetikitini leZipra, eleZapu kukanti uChiwenga usetikitini lokuthi nguye owafaka uMnangagwa esikhundleni esexotshiwe umsebenzi yi-party iZanu PF konke leGovernment.”
EleZimbabwe lacina ukuba lomsekeli kaMongameli owesifazana, uNkosikazi Joice Mujuru ngesikhathi sikaMongameli Robert Mugabe, yena owayesekelwa njalo nguMnangagwa.
Forum