WASHINGTON DC - Iqula leEuropean Union (EU) eliphakathi kokwethekelela eZimbabwe lithi uhulumende kumele agcwalise izixwayiso ezenziwa yilumanyano ngemva kokhetho luka2018, ukuze ukhetho lomnyaka ozayo luqhutshwe ngendlela esuthisayo.
Umkhokheli waleliqula, elibizwa ngokuthi yiElection Follow-up Mission, uMnu Elmar Brook, utshele intathelizindaba eHarare ngoLwesihlanu ukuthi uhulumende kumele alethe inguquko ezakwenza ukuthi ukhetho luqhutshwe ngokucacileyo njalo abamabandla aphikisayo bavunyelwe ukukhankasa bekhululekile.
Wengeze wathi izinkokheli zosiko kumele zisebenze zizimele zingathathi hlangothi kwezombusazwe. Uthe njalo bayayamukela imizamo kahulumende yokuguqula imithetho emibi.
Ingcwethi kwezombusazwe, uMnu Effie Dlela Ncube, utshele iStudio 7 ukuthi okukhulunywa liqula leEU yikho kanye okufunwa ngabantwana beZimbabwe.
Your browser doesn’t support HTML5
Ingxoxo loMnu Effie Dlela Ncube
Lanxa uMongameli Emmerson Mnangagwa eseke wethula amazwi okuthi akulanguquko azayenza phambilini kokhetho luka2023, ihofisi yakhe ithi ukhulume ngadaba lwenguquko le amhlanganweni awenze labamabandla amancane akumanyano wePOLAD izolo.
Sehlulekile ukukhuluma lomphathintambo obona ngokwethulwa kwemibiko kuhulumende uNkosikazi Monica Mutsvangwa.