WASHINGTON DC - Intengo yesinkwa ikhangelelwe ukukhwela kusasa isuka kumadola eZimbabwe angamakhulu amathathu alamatshumi amane lanhlanu, ZW$345.00, isiya kumakhulu amane alamatshumi amahlanu lanhlanu, ZW$455.00.
Umkhokheli wenhlanganiso yamankampani aphenkwa isinkwa, iBakers Association of Zimbabwe, uMnu Wellington Peyama uthi bakubona kufanele ukuthatha lelinyathelo ngoba intengo yezinto abazisebenzisayo, ezigoqela ingqoloyi layo isikhwelile.
Ekhuluma leStudio 7 ngoLwesine, uPeyama wengeze wathi enye imbangela yikuqhubeka kwedola leZimbabwe lilahlekelwa luhlonzi nxa liqathaniswa leleMelika.
Ngemali yeMelika, isinkwa esisodwa sikhangelelwe ukuqhubeka sibiza idola elilodwa.
Ukukhuphuka kwentengo yesinkwa lokhu kuza ngesikhathi intengo yezinto, ezigoqela impuphu, itshukela, amafutha okupheka, lokunye iqhubeka iqansa ngesilinganiso esikhulu, osokulethele uzulu weZimbabwe ubunzima obumangalisayo.
NgoLwesine inkampani kamakhalekhukhwini, iEconet, ikhweze imbadalo yayo yokungena ebulenjini be-internet, okulinyathelo elikhangelelwe ukulandelwa ngamanye amankampani encingo yiloba nini.
Unobhala jikelele wenhlanganiso emela izisebenzi, iZimbabwe Congress of Trade Unions (ZCTU), uMnu Japhet Moyo utshele iStudio 7 ukuthi izisebenzi sezomelwe yimpilo kakhulu ngenxa yokukhwela kwentengo mahlayana.
