WASHINGTON DC - Amapholisa ngoLwesithathu ethule amabizo abembi abayisikhombisa abafele emgodini weBucks Mine, eColleen Bawn ngoMgqibelo kulandela ukukhitshwa kwezidumbu zabo emgodini lo.
Abembi laba babalisa obengumaneja uMnu Ezweni Masuku, uChrispen Ndlovu oleminyaka yokuzalwa engamatshumi amathathu lambili, 32, njalo ovela esigabeni seNekambe eHwange, uWisdom Munsaka, 28, odabuka eSinamagonde eBinga, loDesire Ncube, 25, ozalwa eHwange.
Abanye njalo nguPanganai Chimuka, 23, uChester Mbangeni, 59, kanye loAbie Mudimba, yena amapholisa athi asadinga eminye imininingwana yakhe.
Isikhulumeli samapholisa uMnu Paul Nyathi uxwayise abanikazi bemigodi ukuthi balandele zonke indlela ezifaneleyo zokuvukela izisebenzi ukuze kwenqatshelwe ingozi ezinje.
Ukhansila weGwanda uMnu Jaston Mazhale utshele iStudio 7 ukuthi ukufa kwabembi laba kuveza sobala ingozi uzulu weZimibabwe asezifaka kuyo ezama ukuziphilisa ngenxa yokutshabalala komnotho.
