WASHINGTON DC – Amapholisa alise umkhokheli webandla leCitizens Coalition for Change (CCC) uMnu Nelson Chamisa ukwenza umhlangano wokukhankasela ukhetho eMarondera ngoMgqibelo.
Abalandeli balelibandla bebephume ngezinkulungwane kodwa bathe befika enkundleni yeRudhaka, lapho obekumele kuqhutshelwe khona lumhlangano bathola amapholisa ahlome ngemibhobho, izamboko kanye lezinja evimbe intuba esithi akula muntu ongenayo.
UChamisa uzame ukukhulumisana lawo kodwa aqhubeke ejamile amxwayisa ukuthi achithe abalandeli bakhe babuyele emakhaya.
Ukwenzile lokho uChamisa kodwa utshele abalandeli bakhe ukuthi ibandla lakhe alilwi lamapholisa lanxa evimbe umhlangano walo.
Ibandla leCCC like lagijimela enkantolo kamantshi leyeHigh Court phezu kwaloludaba kodwa alisitholanga isinqumo ebelisikhangelele.
Amapholisa e-riot avimbe umkhokheli weCCC uMnu Nelson Chamisa ukwenza umhlangano eMarondera ngoMgqibelo. (Umfanekiso: VOA/Frank Chikowore)
Isikhulumeli samapholisa uMnu Paul Nyathi yena wethule umbiko enkundleni yeTwitter exwayisa amabandla ukuthi kumele elandele yonke iminingingwana yomthetho weMaintanance of Peace and Order Act (MOPA) nxa ezaba lemihlangano.
Umsekeli wesikhulumeli seCCC uMnu Gift Ostallos Siziba utshele iStudio 7 ukuthi kungelani lokuvinjwa komhlangano wabo eMarondera, baya phambili ngeminye imihlangano abayihlelileyo egoqela oweBeitbridge ngeSonto.
Your browser doesn’t support HTML5
Ingxoxo loMnu Gift Ostallos Siziba