WASHINGTON DC - Ibandla leCitizens Coalition for Change (CCC) lithi ingamanga imbiko yokuthi uMnu Mboneni Ncube ubengayisilolunga lalo.
UNcube ubulawe ngabanakelwa ukuthi yizikliwi zeZanu PF emhlanganweni wokukhanksela ukhetho oqhutshelwe eKwekwe ngumkhokheli walelibandla uMnu Nelson Chamisa ngeSonto.
Isikhulumeli seCCC uNkosazana Fadzayi Mahere wethule umfanekiso kaNcube egqoke impahla ezilempawu yebandla leli kulandela udaba oluphume kuphephandaba likahulumende eleChronicle, obelusithi umufi wayengaso mlandeli kaChamisa.
Kulembiko ethi umalume kamuyi, obikwa esekela ibandla leZanu PF, nguye okhanya esebenzelana labebandla elibusayo emizameni yokuhluthuna isidumbu sikamuyi.
Umalume lo ubikwa evimbe inkokheli kanye labalandeli beCCC ukuthi bafike emzini wakhe lapho okukhalelwa khona uNcube.
Ibandla likaChamisa lithi liqhube uphenyo kuzigaba zonke zelizwe lichwayisisa ukuthi uzulu uthini ngodlakela lolu. Ngomnyaka ka2013 ibandla leli lisayiMDC-T njalo lisakhokhelwa ngumuyi uMnu. Morgan Tsvangirai lacina liphuma kukhetho ngenxa yodlakela.
Umsekeli wesikhulumeli salo, uMnu. Felix Magalela Mafa Sibanda utshele iStudio 7 ukuthi abantu bacacile kuphenyo lwabo ukuthi baphatheke kubi ngaloludlakela.
