WASHINGTON DC - Ikhomishini ebona ngokukhumisana umlotha, iNational Peace and Reconciliation Commission (NPRC), yethule umbiko izolo ixwayisa abantu ukuthi batshiyane lodlakela kuyiwa nje kukhetho.
Kodwa isimanga yikuthi likhomishini ayizange ilulokothe udaba lokubulawa kwelunga lebandla likaMnu Nelson Chamisa, eleCitizens Coalition for Change (CCC), ngabantu abanakanelwa ukuthi yizikliwi zeZanu PF.
Amapholisa athi uMnu Mboneni Ncube, 35, ubhubhe ngemva kokugwazwa ngabasekeli beZanu PF eKwekwe ngeSonto ngesikhathi kubuthene inkulungwane zabantu ababelalele uChamisa ekhuluma emhlanganweni wakhe wokukhankasela ukhetho.
Sokubotshwe abasolwa abalitshumi lasithupha, 16.
Kumbiko ewethule izolo, likhomishini ayizange ikhulume ngitsho ngesehlakalo lesi ngaphandle nje kukukhuluma kabanzi isinti abaphatheka kukhetho kumele bakhankase ngokuthula.
Le yinto esolwe kakhulu ngabalwela amalungelo oluntu abafana loMnu Mbuso Fuzwano, owenhlanganiso yeIbhetshu Likazulu, yena othi likhomishini itshengisa sobala ukuthi isekhwapheni leZanu PF.
Uthe ngabe ayithathi hlangothi, ngabe yethule umbiko oqondane lokubulawa kukaNcube njalo isola iziphathamandla zeZanu PF, zona athi zitshotshozela udlakela oluqondiswe kubasekeli bebandla likaChamisa.
Umsakazo weStudio 7 wehlulekile ukukhuluma lomgcinisihlalo wekhomishini le uMnu Selo Nare ngoba ubengadobhi ucingo lwakhe.
