WASHINGTON DC - Kulabantu ekade behlome ngombhobho lamahloka abahlasele endlini yomsekeli kaMongameli webandla leCitizens Coalition for Change (CCC) uMnu Tendai Biti phakathi kobusuku eHarare bagamula owesilisa olinda kulindlu walimala kakubi.
UMnu Biti uncintisa kukhetho lokudinga umeli weHarare East ephalamende, okuyisikhundla ayekuso wasexotshiswa yiMDC-T ekhokhelwa nguMnu Douglas Mwonzora loNkosazana thokozani Khupe.
Imifanekiso ethunyelwe umsakazo weStudio 7 iveza unogada lo esopha igazi njalo elamanxeba okuganyulwa ekhanda amathathu. Izembatho zakhe bezibomvu ngegazi.
Abantu laba babikwa befike balwisana lonogada lo besithi bafuna uBiti, yena obengekho endlini ngaleso sikhathi. Obekhona ngunina lamanye amalunga omndeni abikwa ehlabe umkhosi ngesikhathi kuhlaselwa umlindi lo.
Ofundela ubugqwetha njalo elwela amalungelo oluntu uMnu Emmanuel Zellers Gumbo, utshele lumsakazo esekiliniki lonogada lo ukuthi ulimele kakubi.
Kodwa uthe ekiliniki katholanga ukwelatshwa okufaneleyo ngoba abongi bathe kumele abuye lencwadi evela emapholiseni echaza ukuthi ulimale esenzani.
UGumbo uthe bacabangela ukuthi lokhu kwenziwe ngabasekeli beZanu PF, bona athi batshiye umbiko oyethusayo okhomba ukuthi bafuna ukulimaza uMnu Biti.
Sehlulekile ukukhuluma loBiti, amapholisa kanye labeZanu PF ngesehlakalo lesi ngoba bekusebusuku.
Udlakela lolu luza ngemva kokubulawa kwelunga leCCC uMnu Mboneni Ncube eKwekwe ngeSonto ngabantu abanakanelwa ukuthi ngabasekeli beZanu PF.
Ibandla leli lithi uNcube wagwazwa ngomkhonto ekuhlaselweni kwabasekeli balo ngesikhathi umkhokheli walo uMnu Nelson Chamisa ekhuluma emhlanganweni wokukhankasela ukhetho owangenwa zinkulungwane zabantu eKwekwe ngeSonto.
Kodwa abeZanu PF bayakulandula lokhu.
