WASHINGTON DC - Ikhomishini ebona ngokulondolozwa kwamalungelo oluntu, iZimbabwe Human Rights Commission (ZHRC), isixwayise abezombusazwe ukuthi batshiyane lenkulumo eziphehla udlakela.
Kumbiko ewethule izolo, likhomishini ithe ikhathazekile ngodlakela olukhanya solumemetheka ngesikhathi kulungiselelwa ukhetho lwamaby-elections.
Lumbiko uza ngemva kodlame oluqhamuke emhlanganweni oqhutshwe ngumholi webandla leCitizens Coalition for Change (CCC) uMnu Nelson Chamisa eKwekwe ngeSonto.
Kuloludlakela kufe umlandeli webandla leli uMnu Mboneni Ncube ngemva kokugwazwa ngabantu abanakanelwa ukuthi yizikliwi zeZanu PF.
Kodwa njengePeace and Reconciliation Commission ethule owayo umbiko kuthange layo isola udlakela, iHuman Rights Commission ayizange ikhulume ngitsho ngokubulawa kukaNcube.
Ixwayise amapholisa ukuthi kumele elondoloze umthetho engathathi hlangothi njalo ehloniphe amalungelo oluntu.
Ohlaziya ezombusazwe uMnu Difa Dube utshele iStudio 7 ukuthi kuyadingeka ukuthi amakhomishini la akhulume ngezehlakalo zodlakela eziqambe nxa zither zenzeka njengokubulawa kukaNcube hatshi ukugudla iguma.