WASHINGTON DC - Umsekeli weCitizens Coalition for Change (CCC) obulawe ngabantu abanakanelwa ukuthi yizikliwi zeZanu PF eKwekwe ngeSonto uMnu Mboneni Ncube ubeyindoda eleminyaka engamatshumi amathathu lanhlanu, 35, esanda kuthatha umfazi njalo ulomntwana omncane.
Lokhu kuvezwe ngumkhokheli walelibandla uMnu Nelson Chamisa ekhuluma lentathelizindaba eHarare izolo.
UChamisa usole isehlakalo lesi kanye lokuhlukuluzwa mahlayana kwabasekeli bebandla lakhe esithi umanyano weSadc kumele ungenele ngoba udlakela lolu lungacina ludala ukungahlaliseki emazweni asemhlubulweni wezansi yeAfrica.
Lanxa amapholisa aphenya loludaba eKwekwe ekubeke sobala ukuthi abanye bababotshiweyo ngabasekeli beZanu PF abaziwayo, abebandla leli bayakulandula lokhu.
Ilunga leZanu PF uMnu Believe Gaule utshele iStudio 7 ukuthi lanxa belusola loludlakela, kumele abantu bamelele amapholisa eqede uphenyo lwawo ukuze kwazakale iqiniso eligcweleyo.
Amapholisa athi asebophe abasolwa abalitshumi lasithupha njalo athi adinga ingqungquthela yabo, uKennedy Simbi, onakanelwa ukuthi nguye owagwaza inxeba elabulala uNcube.
Abasolwa laba bahlasele amalunga eCCC ngezikhali ezigoqela imikhonto, amatshe, izinsimbi kanye lamabhemba emhlanganweni wokukhankasela ukhetho ngesikhathi uChamisa esenkundleni ekhuthaza abantu ukuthi bavotele ibandla lakhe.
Umsekeli wesikhulumeli sebandla leCCC uMnu Gift Ostallos Siziba uthe lanxa behlukuluzwa lokubulawa ngalindlela, bazaqhubeka ngomkhankaso wabo wokususa iZanu PF embusweni kukhetho oluzayo.
