WASHINGTON DC - Amapholisa athi asebophe abasolwa abalitshumi lasithupha, 16, phezu kokubulawa komsekeli webandla leCitizens Coalition for Change (CCC) ngabantu abanakanelwa ukuthi yizikliwi zeZanu PF, zona ezimgwaze ngomkhonto izolo.
Isikhulumeli samapholisa uMnu Paul Nyathi ukhuthaze uzulu ukuthi etshiyane lodlakela njalo uthe amapholisa asevule uphenyo phezu kwaloludaba. Uthembise ukuthi bazakwethulela uzulu okunengi maduze.
Udlakela lolu luqhamuke ngesikhathi uChamisa esenkundleni esethula amazwi okukhuthaza inkulungwane lenkulungwane zabantu abaye emhlanganweni wakhe eKwekwe ukuthi bavotele ibandla lakhe.
Lelibandla lithi abasekeli beZanu PF ekade beze emhlanganweni walo begqoke imvunulo yeCCC bezenza abasekeli bakaChamisa bahlasele ngezikhali ezigoqela imikhonto, amatshe lembhembha, balimaza amalunga alo alitshumi lasikhombisa, 17.
Abantu laba bahanjiswe esibhedlela.
Imifanekiso ethulwe nguChamisa lebandla lakhe enkundleni zokuxhumana ezitshiyeneyo iveza abasekeli beCCC abagqoke okulithanga belimele kakubi njalo besopha igazi.
Loludlakela luza ngemva kokuba umkhokheli kaMongameli Emmerson Mnangagwa, uMnu Constantino Chiwenga, etshele abasekeli beZanu PF ngoMgqibelo ukuthi ibandla likaChamisa bazalichola njengentwala, kubike iphephandaba leThe Standard.
Isikhulumeli sebandla leCCC koBulawayo uMnu Swithern Chirowodza utshele iStudio 7 ukuthi udlakela lolu lukhomba sobala ukuthi akusoze kube lokuthula kukhetho luka2023.
Ilunga leZanu PF uMnu Believe Gaule uthe lanxa ekusola kakhulu ukubulawa kwelunga leCCC, akumelanga abantu bagijimele ukusola ibandla lakhe ngoba kungela bufakazi.
Ummeli womanyano wamazwe aseEurope oweEuropean Union (EU) eZimbabwe, uMnu Tim Olkkonnen aye ulusolile loludlakela esithi amapholisa kumele abophe labo abaludalileyo.
Amazwi akhe agcizelelwe yingcwethi kwezombusazwe uMnu Dumisani Nkomo.
