Izakhamizi zeZansi yemaNdebeleni ezixoxe lomsakazo we Studio 7 zithi zilakho ukuhlaselwa yindlala njalo lonyaka kulandela kuqhamuka kobudli obebungavamanga eminyakeni edlulileyo.
UNkosikazi Saziso Khumalo oyisakhamuzi seVokola eInsiza uthi izilimo zizatshabalala ngenxa yemhogoyi.
"Imihogoyi ikhona sibili iyala, isiskhipha ekudleni ngoba amabele ayadliwa, iyangena phakathi kwenhliziyo ichithize, sesisethuka ukuthi engxenye sizacina singasatholi ukudla siphinde sihlaselwe yindlala yanyakenye, lokhu sikhangele ukuthi abezokulima bazasincedisa ngemithi yokusprayer. "
Uphinde wathi lamadlelo asengozini ngoba limhogoyi isidla lotshani.
"Sekuleminye imihogoyi edla utshani, lapho edle khona akusali tshani leyo ke ngeyegangeni idla utshani le idla izilimo zethu so silokudana ukuthi hawu Nkosi besisithi sizake sithole ukudla lonyaka kodwa hayi imihogoyi isithwalise nzima ."
Lamazwi agcizelelwe nguMnu. Collen Ngwenya oyisakhamuzi seMatobo othi isivuno silakho ukutshabalala ngenxa yobudli lobu obuhlasele izilimo.
"Sibona amabele ayadliwa njalo udla kubi lumhogoyi ngoba udla inhliziyo yamabele nxa sokudliwa inhliziyo kutsho isivuno kasisekho sokuyatshakaza kukuncane kucine kungafakanga isivuno esisilindeleyo, imihogoyi nxa singenile akulula ukuthi uyikhiphe, besicela uhulumende asisize ngemithi yokusprayer ukuze khonokho esikugcinileyo singalambi njalo, nyakenye silanjiswe yikuthi bekungelazulu lonyaka kulezulu sokulobudli."
UMnu. Gabriel Moyo oyisakhamuzi seMawane eGwanda South uthi lanxa limhogoyi ihlasele balokubonga kuhulumende nova ebaphathise ngemithi.
"Imhogoyi ikhona, abantu bathwele nzima emasimini ngemhogoyi, kodwa sibongela ukuthi uhulumende usheshe wabisa imithi yemhogoyi ukuthi abantu baspray emasimini leduzane lapho ekhona, okwalonyaka kusimangalisili asikaze sibe lakho thina lokhu kodwa lonyaka ungakhangela utshani kumnyama tshuma."
Kusenjalo isidumbu somfundi weNtepe Primary school owathathwa ngumfula wanyamalala phose okwamaviki amabili utholakale ngeSonto ngemva kokugejwa esizibeni yizakhamizi.
Izakhamizi zisole kakhulu ukungancediswa nguhulumende lapho zigebha ngezandla.
Forum