Abalimi eMatabeleland, eNkabazwe lezinye izabelo bathi izilimo zabo sezihlaselwe zinhlavane leminye imihogoyi.
Bathi bazakwehluleka ukuthola izivuno eziphezulu lonyaka ngenxa yemihogoyi le. Izigaba ezihlaselwe kakhulu zinhlavane ezidla inhliziyo yomumbu lamanye amabele zigoqela eKezi, Gwanda North, Mberengwa lezinye.
Imihogoyi eyaziwa ngokuthi yi-army worm edla imikhwani yomumbu leyamabele layo ihlasele eHwange, Umguza, Zvishavane, Gutu, Masvingo, Hurungwe, Zvimba lezinye izigaba.
Abalimi kwezinye izigabe lezi bebebhekane lendlala enkulu nyakenye eyadalwa yisikhudumezi somkhathi ese-El Nino.
Sixoxe ngohluphu lwemihogoyi etshiyeneyo lenduna uNgwenyama Fuyana osesiqintini seFumugwe eMatabeleland South.
“Izibungu lezi zidla inhliziyo yomumbu oguquka umbala uhle utshe. Abadala lapha baphila ngokuthola uncedo kuhulumende. Banikwa umuthi wokubulala izibungu lezi kodwa okukhona yikuthi ungawufaka ugeziswa lizulu elina nsukuzonke,” kutsho induna uFuyana.
Abalimi abanengi nyakenye babhekane lendlala enkulu eyabangelwa yisikhudumezi somkhathi ese-El Nino.
Forum