Oscar Nkala
Izakhamizi zeLower Gwelo Mission, eNkabazwe, zikhala ngemikhuhlane yenkomo kanye lamasela antshontsha izifuyo ngitsho lasemini libalele.
Abafuyi abakhulume leStudio 7 bathi kulomkhuhlane abangawuqondi kuhle oqhamuke esabelweni lesi nyakenye, osuvukile njalo kulezinsuku, othi ungahlasela inkomo ibonakale ngokugxoza indenda ngaphambi kokufa ingazange igule ngendlela esobala.
Bathi ngaphandle kwendlala ka2024 ebulele inkulungwane lenkulungwane zezifuyo, izibaya ezinengi zivaliwe eNkabazwe ngenxa yomkhuhlane lo, wona ongazange waziwe ukuthi ubangelwa kuyini kahle-kahle lokuthi welatshwa njani.
UMnu. Clever Ncube ngomunye wezakhamuzi zeLower Gwelo Mission.
“Umkhuhlane lo usuqalile ezindaweni ezinjengako Gondonga, Makepesi usiya ngapha eMambanjeni lakho sebekhala ngawo umkhuhlane oke wahlupha nyakenye. Lapha eMission umkhuhlane osuhluphe kakhulu ngumkhono. Ngikhuluma nje zinhlanu ezami esezitshaywe ngumkhuhlane womkhono.”
Esinye njalo isakhamuzi uMnu Might Bhebhe uthi bakhathazeke kakhulu.
“Umkhuhlane lo uke wabakhona. Wathi ugcwele lapaha izinkomo zafa zaphela, kodwa ukuthi welatshwe kwehlula. Silokudana ngoba usuqalile njalo lumkhuhlane.”
Ngaphandle komkhuhlane lo, izakhamizi zeLower Gwelo zithi zibhekane lodubo lokuntshontshwa kwenkomo ngamasela ahlasela ngitsho lasemini ilanga libalele.
UMnu. Bahlangene Nyathi uthi ezinye zithathwa emadlelweni kanti njalo amanye amasela angena ezibayeni abulale inkomo aqukule inyama yonke atshiyele abanikazi umswane kuphela.
“Kithi lapha ubusela benkomo bukhona njalo bunengi. Kunzima ukuthi sithi kwenziwe njani ngoba asikwazi ukuthi abatshontshayo ngobani, babonakala njani njalo babanjwa njani. Kodwa uzezwa kusasa kuthiwa inkomo ihlinziwe njalonjalo kodwa akukaze kubotshwe muntu.”
UMnu. Thabani Ncube ngomunye owatshontshelwa inkomo nyakenye.
“Ubusela benkomo sobuvamile kakhulu, sobubunengi kakhulu ngoba inkomo zithathwa langabanye abantu abaziwayo. Bayabuya bathathe, kuhlalahlale baphinde njalo. Nginjenje lokhu ngidinga ezinhlanu ezatshontshwa ngomnyaka ophelileyo. Ngilencwadi engayiphiwa ngamapholisa ukuthi ngidinge yonke indawo kodwa lanamuhla azibonakalanga.”
Umphathintambo wezokulima uMnu. Anxious Masuka utshele iStudio 7 ukuthi lanxa engakalutholisisi kahle udubo lomkhuhlane ohlasele eLower Gwelo Mission, abalimi kumele bahlabise njalo badibhise inkomo zabo sikhathi sonke ukuze zivikeleke emikhuhlaneni eminengi edalwa yimikhaza lezulu.
Imikhuhlane le igoqela oweTheileriosis owaziwa njalo ngokuthi yiJanuary disease, oweRedwater, oweHeartwater kanye loweAnthrax.
Amapholisa eLower Gwelo avumile ukuthi ngempela ukwebiwa kwenkomo kubhahile kulumango kodwa athe angeke akhulume okunengi lalumsakazo engaphiwanga imvumo ngabaphezulu.
Forum