Izizalwane zeZimbabwe ziyingxenye yamakhulu emndeni elinde ukuhlengwa kwezihlobo zayo ezisemgodini wegolide eStilfontein esabelweni seNorth West kweleSouth Africa lapho ebezigebha khona igolide ngokungekho emthethweni.
Izihlobo zalabo abasemgodini lo zithi zikhathazeke kakhulu ngabanye babo osekwedlule izinyanga bengahlengwanga emgodini wegolide lapho abebetsheketsha khona eStilfontein.
Kusukela ngoMpalakazi nyakenye, amapholisa akweleSouth Africa asungule uhlelo lokuvala yonke imigodi emidala esetshenziswa ngotsheketsha ukugebha igolide ngokungekho emthethweni.
Kodwake athe ukufika komunye umgodi eStilfontein, otsheketsha abasemgodini lo balile ukuphuma.
Isizalwane seZimbabwe uNkosazana Linah Minezeya, olamadodana amabili aphakathi kwalo umgodi utshele iStudio 7 ukuthi ukhathazeke kakhulu njengoba sekuphele inyanga amapholisa esala ukuthi kungene ukudla lamanzi emgodini lo.
“Ngifuna abantwana bami laba emgodini unamba 3. Bangena ngoFebruary manje ngiyabafuna bakhone ukuphuma phandle ngikhone ukubathola ndiye nabo eZimbabwe. Ndiyabafuna noma beshonile.”
Omunye owesilisa weZimbabwe owalileyo ukuveza igama yena olezihlobo zakhe ezimbili kulo umgodi, uthe ukhathazeke kakhulu ngoba labo abahlengwe yizakhamizi kulo umgodi babatshele ukuthi kulasebefile abafika isithupha phansi emgodini okwenza bazibuze ukuthi izihlobo zabo zisaphila kumbe hatshi.
Omunye wenkokheli yezakhamizi zeStilfontein uMmnumzana Johannes Qankase, uthi okwenziwa ngamapholisa lokhu kufana xathu lokubulala abantu.
“Siyayihlonipha imithetho njalo siyayithanda eyokuvala umgodi. Kodwa uvala umgodi njani ungakhuphanga abantu kuqala. Sababuza ukuthi iqhinga lenu ibiyin? Kuyabonakala ukuthi bekungela plan at all ngoba ma ume phezu komgodi ungafuni ukuthi umuntu aphume uthi uzabona ukuthi uzophumelaphi, kutsho ukuthi uyambulala lomuntu. So iplan yenu ibiyi 1 eyokuthi nibulale abantu nina alibasindisi.
Kodwa isikhulumeli samapholisa uNkosikazi Athlenda Mathe, uthi abavimbelanga otsheketsha ukuphuma kulo umgodi.
Uthi bona balindile kuphela entubeni yalo umgodi ukuze labo abaphumayo babotshelwe ukugebha igolide ngokungekho emthethweni kanti abangelamaphepha bazabotshelwa njalo ukungena elizweni ngokungekho emthethweni.”
“Le yiyo indlela engcono kulazo zonke esiyisebenzisileyo ukuqeda ukwephulwa komthetho ngoba silindile lapha sisithi abasemgodini laba abaphume bajeziswe ngumthetho ngecala labo.”
Ngemva kokuthola imvumo yamapholisa izakhamizi sezenelise ukukhipha otsheketsha abedlula itshumi lesidumbu esisodwa besebenzisa intambo okungumsebenzi onzima kakhulu.
Kugwalo lwakhe alubhala viki zonke umongameli Cyril Ramaphosa uthe uyalisekela inyathelo lamapholisa lokuvimba ukungena kokudla kulo umgodi wathi leyo yindlela yokukhuthaza abaphakathi ukuthi baphume babotshwe ngecala abalenzayo lokugebha igolide ngokungekho emthethweni.
Igqwetha lezamalungelo oluntu uNkosikazi Yasmin Omar, useze waya emthethwandaba esiyacela ukuthi amapholisa avumele ukudla lamanzi kungene emgodini ngesikhathi kusalolwa icebo lokuhlenga otsheketsha laba.
“Bazaphuma njani laba bantu emgodini njengoba sebelamaviki bengadli okutsho ukuthi abaselamandla. Sifuna umthethwandaba ulaye ukuthi baphiwe ukudla ukuze bathole amandla okuphuma.”
Lobanje uhulumende ekuqaleni ubethe akazukuzihlupha ngokusiza otsheketsha laba ukuphuma emgodini-lo, usetshintshe inqondo wabumba iqula labahlengi okukhangelelwe ukuthi liqale ukuhlenga otsheketsha laba kungensuku zatshwala.
Akwaziwake ukuthi bazavuma ukuphuma bonke njengoba amapholisa esithi wona awasoke angene kulo umgodi ngoba kuyingozi.
Forum