Uhulumende wesabelo seGauteng kweleSouth Africa useyethule imithetho okwesatshelwa ukuthi izakwenqabela abokuza ukuqhuba amabhizimusi okuziphilisa awokuthengisa ukudla emalokitshini okuyindlela yokuphila kwabeZimbabwe abanengi.
Ngokutsho kwemithetho emitsha elawula ukusebenza kwezitolo ezisathuthukayo ezithengisa ukudla ezidume ngokuthi ngamaSpaza kweleSouth Africa, bonke abanini bezitolo lezi kulesisabelo kuzafuze babhalele ukuthola amacence amatsha okusebenza kusukela ekuqaleni kwenyanga ezayo.
Ukuze umuntu athole lelicence kuzafuze indawo athengisela kuyo ihlolwe ngabezempilakahle ukuthi ifanele yini ukuthengisela ukudla. Umathengisa kuzafuze achaze njalo ukuthi ukudla akuthengisa lapha uzakuthenga kuphi.
Phezukwalokhu, izitolo zabokuza kuzafuze ziqhatshe abathile abayizizalwane zakweleSouth Africa njengesinye semigoqo yokuthola imvumo. Umkhokheli kahulumende weGauteng uMnumzana Panyaza Lesufi uthi zonke izitolo ezisesabelweni sakhe zizasebenza phansi kwalo umthetho.
“Nxa ungabhaliswanga waphiwa imvumo yokuthengisa ungaqali ukutholakala usuvule isitolo uthengisa ungelamvumo. Amakhansili amadolobho wonke esabelweni azaqinisekisa ukuthi lumthetho uyalandelwa.”
Kodwa-ke umkhokheli webandla leAction SA uMnumzana Herman Mashaba utshaya phansi ngentonga esithi bangalingi baphe abokuza imvumo yokuthengisa emalokitshini.
“Wonke umnotho wemalokitshini kufanele ubesezandleni zezizalwane zakweleSouth Africa. Nxa ungumuntu wokuza uzitshela ukuthi uyakwazi ukuqhuba ibhizimusi loba ulephepha loba awulalo, phuma uphele elokitshini uyeqhuba lelo bhizimusi elizweni lakho.”
Lelinyathelo lisekelwa yisakhamuzi selokitshi leSoweto uMnumzana Titus Motang.
“Kulaba abathi awavalwe abantu bahambe lami ngiyavumelana labo. Ngithi awavalwe igovernment yethu esiyivotele esingaphansi kwayo ayisinikeze imali ukuthi sikhone ukuvula lezi izispaza shop kube nebhizimusi abantu bakhone ukuphila so that icrime ikhone ukwehla.
Esinye isizalwane sakweleSouth Africa uNkosikazi Nolufefe Gwanya ongomunye wamapholisa esigaba eSoweto uthi sebesesaba ukuthenga ezitolo zabokuza.
“Izinto ezininzi zabo abazithengisela abantwana bethu zibolile. Abantwana bethu bayaphela eSoweto and igovernment yethu ayinandaba nathi. And namanje kunento eveziweyo ukuthi kufanele kube ne code ebhekwayo. Abanye abantu abanaso sikhathi sokubheka leyacode. Bayathenga bajahile bayahamba. Ufike phambili uyayidla lento uyafa or uphekela abantwana bakho bayafa bonke and then ifamily yakho iphelile.”
Lokhu kuzabangela ukuthi kube nzima kakhulu ukuba abokuza laba baqhube amabhizimisila emalokitshini njengoba eqhutshelwa ezindlini zalaba bantu asebesithi abahambe. Yibo njalo laba bantu okukhangelelwe ukuthi bathenge nxa esevuliwe.
Isikhulumeli senhlanganiso yeAfrican Diaspora Forum kanye lenhlanganiso yeZimbabwe Community in South Africa, uMnumzana Bongani Mkhwananzi, uthi lobanje belemukela ngezandla zombili inyathelo lokuvikela ukufa kwabantu abathenga ukudla kulezi zitolo, kunengi abakwesabelayo ekuqhutshweni kohlelo lokubhalisa kabutsha.
“Nakhonanje kulemithetho amaregulations la azo implementwa, asikufisi kube yindlela yokususa abantu bokuza kumabhizimusila akade sebewavulile. Ma kuyiregulation akwenziwe ngenxa yokuthi yiregulation ezonceda umphakathi ukuthi udle into ezihloliweyo kungabi lengozi lezi esizitholayo ngoba lokhu akulunganga emphakathini.”
Inengi labaqhuba amabhizimusi ezitolo lezi ezincane ezithengisa ukudla, yizizalwane zase Ethiopia, Somalia lePakistan. Kodwake bakhona abeZimbabwe labo abalalezi zitolo ikakhulu ezithengisa ukudla okuphekiweyo emalokitshini afana leTembisa, eAlexandra lakwezinye indawo zeSoweto.
Kusukela izolo amapholisa aqalile ukungena ezitolo lezi ezithengisa ukudla kuhlolwa ukuthi abanini bazo balamaphepha yini okuba kweleSouth Africa, balayo yini imvumo yokuthengisa ukudla kanye lokuthi bakuthenge ngaphi ukudla abakuthengisayo.
Forum