Ngesikhathi umhlaba wonke uqhuba umkhankaso weBreast Cancer Awareness Month, abesilisa abazibiza ngokuthi ‘Men in Heels’ kumbe amadoda agqoke oqwa, akhankasela ukuba abesilisa behlolwe imvukuzane yebele elakho ukubahlasela njengabesifazane.
Lamadoda avunula aphelele ngaboqwa, iziketi zephinki lezikipa ezimhlophe bazihambelenje etshatshalazini bengagqize qhakala.
Umsunguli wenkampani yezokuxhumana eyeBlack Cherrie Management Holdings uNkosazana Lerato Molete uthi inhloso yale imvunulo yikukhanga iso labesilisa besekutholakala ithuba lokubalimukisa ngokuthi labo bayahlaselwa yimvukuzane yamabele ngakho kufuze bayehlolwa.
Uthi ufisa abesilisa abanengi bebeyigxenye yokugqoka laba oqwa ukuze ubuhlungu bokugqoka oqwa bubakhumbuze ubuhlungu abazabuzwa nxa bengekela ukuyahlolwa imvukuzane yamabele kusesemasinyane.
“Ngibona kudingeka ukuthi obaba baye esibhedlela bayosheka iprostate health yabo le breast health yabo because ibreast leprostate health inelink. So, its important kubobaba to go and test early so that bavikeleke.”
lnhlanganiso elwisana lomkhuhlane wemvukuzane kwele South Africa iNational Breast Cancer Foundation ithi kusiyaphela lonyaka kuzabe sekulabesilisa abaphose bafike izinkulungwane ezintathu (3000) abazahlaselwa yimvukuzane yamabele kweleSouth Africa. Ithi abangamakhulu amahlanu (500) kuleli nani bazabulawa yilo umkhuhlane.
Inengi labesilisa beZimbabwe abakhulume leStudio 7 bathi ngokokuqala ukuzwa ukuthi amadoda lawo ayahlaselwa yimvukuzane yamabele. Isizalwane seZimbabwe uMnumnzana Greatman Mkhwebu uthi zindaba ezethusayo kakhulu.
“Kuloludabanje engingakutshonje angifuni kuqamba amanga. Angikaze ngizwe ngomkhuhlane okuthiwa yibreast cancer ngapha emhlubulweni wabobaba. Bekungumkhuhlane engiwaziyo ukuthi ngumkhuhlane ohlasela kakhulu abesimame. Kodwa ukuthi usubuye ukuzotshaya la kubobaba angikaze ngizwe mpela. Kwamina umkhuhlane wecancer ngiyawazi ngijwayele icancer ejwayele ukuhlasela obaba iprostate cancer lale enye icancer. Engikwaziyo yikuthi ngumkhuhlane oyingozi ongelaphekiyo.”
Esinye isizalwane seZimbabwe uMnumnzana Khulekeni Nyoni owaziwa kakhulu ngokuthi nguSgidi laye uthi ngokokuqala ukukuzwa lokhu.
“Njengoba ngingakayiboni mathupha lakomunye umuntu engiyazi ukuthi iba yisimo esinjani ma isithe yakufikela emzimbeni. Phoke singabobaba sinenkinga eyodwa, silohlupho olulodwa sikubeke eqinisweni. Asizwani lezinto zokuya emtholampilo lezi. Yikho okunye okuzenza ukuthi ibreast cancer le ithathe imiphefumulo yabanye bethu singabobaba.”
Isizalwane sakweleSouth Africa uMnumnzana David Lucas osewahlaselwa yimvukuzane kabili ngomunye wabakhokhela lo umkhankaso wabo qwa.
“Kufanele uzinakakele, uzithande. Lokhu ukwenzele lalabo abakuthandayo ngoba banengi abakuthandayo emulini lase mphakathini. Kubo bonke laba bantu uqakathekile njalo bayakudinga empilweni zabo.”
Esinye njalo isizalwane sakweleSouth Africa uNkosazana Anneline Mathiba uthi wafelwa nguyise ngenxa yemvukuzane ngemva kokuphuza ukuthola usizo lokwelatshwa.
“Ubabami bekane prostate cancer angafuni itreatment. Ngalesisikhathi kumele ukuthi aye kutreatment it was already too late. Umalumami wamthatha wamusa esibhedlela for itreatment it was already too late. Ubabami he didn’t want the whole process yokuya eoperation, the whole process yokuya for ichemotherapy.”
Le yinto egcizelelwa nguMnumnzana Kwena Mwabelo.
“I think for amadoda it’s a question yokuthi we must go and see idoctor when you are not feeling well because asithandi ukukhuluma ngento zokugula. So, I just feel ukuthi as amadoda we just need to be honest with ourself siyeni kudoctor and test because you don’t lose anything if you go out and test.”
Umongikazi uNkosikazi Zinhle Sithole osebenza njalo kakhulu lenhlanganiso yeCancer Association of South Africa, ukhuthaza abesilisa ukuthi bazifundise ukuhlala besiyahlolelwa imvukuzane yamabele kanye leminye imihlobo yemvukuzane kanye phakathi kweminyaka emibili.
“Kubalukele kakhulu ngendlela yokuthi noma kuyisifo esijwayele ukuhlasela omama, kodwa umdlavuza webele lamadoda bayaba nawo so, kubalulekile ukuthi indoda izinakakele, ibheke ukuthi akukho utshintsho emabeleni akhe and ma ebona ukuthi ikhona into engamphethe kahle kumbe kunotshintsho kuyamele aye emtholampilo oseduze naye ayecela usizo.”
Ngokutsho kohlangothi lwezibalo zikahulumende iStatistics South Africa, phakathi kuka 2008 kusiya ku2019 kube labantu abazinkulungwane ezingamatshumi ayisitshiyagalombili lanhlanu (85,000) ababanjwe umkhuhlane wemvukuzane kweleSouth Africa. Leli linani kucatshangelwa ukuthi khathesi selisedlula inkulungwane ezilikhulu.
Forum