Ibandla eliphikisayo eleCCC selisole kakhulu amazwi kaMongameli Emmerson Mnangagwa awethule emhlanganweni weUnited Nations General Assembly ngoLwesine lapho azitshaye khona isifuba esithi iZimbabwe yiyo elomnotho othuthuka ukwedlula eyamazwe wonke asezansi yeAfrica.
UMnangagwa uthe njalo eleZimbabwe lilawulwa ngulombuso wentando kazulu, i-democracy, lokuthi ukhetho olusanda kwedlula luqhutshwe kuhle loba nje lusolwa ngamaqula enhlanganiso ezinengi, ezigoqela eyeAfrican Union leyeSadc.
Usole njalo izijeziso zenotho azetheswa nguhulumende weMelika lamanye amalunga ebandla lakhe leZanu PF, esithi kumele zesulwe ngoba zilimaza uzulu makhaza.
“Sibona intuthuko lempumelelo engakaze ibonakale kwezomnotho,” kutsho uMnangagwa. “Eminyakeni emithathu edluleyo, umnotho welizwe lethu ukhule ukwedlula eyamazwe wonke aseNingizimu Afrika.”
AbeCCC basole uMnagagwa besithi iqiniso elikhona ngelokuthi umnotho weZimbabwe uyasadalala njalo abantu bathwele nzima lokuthi akulambuso okhululekileyo elizweni.
“Umbuso okhululekileyo lokhetho eZimbabwe yizinto esizazela ku-dictionary, asikaze sizibone,” kutsho uMnu Tim Muringai, oyisiphathamandla seCCC eMelika. “Ngakho nxa uMnangagwa esithi kule-democracy eZimbabwe, uzama ukuzichaza nje.”
Kodwa ilunga leZanu PF uMnu Believe Gaule, usekele amazwi kaMnangagwa esithi ngempela kulombuso okhululekileyo eZimbabwe, khona athi kubangela ukuthi abantu bakhulume yiloba yini abayifunayo.
“Ukhetho lwahamba kuhle, kanti laba abathi aluhambanga kuhle yindaba bevumile ukungena ezikhundleni lapho abakhethwe khona, kumakhansili lasedale lePhalamende?” kubuze uMnu Gaule.
“Umbuso kaMnangagwa awufani lokaMugabe, abantu bakhululekiley yikho usizwa bekhuluma izinto ezingayisizo… Abantu bakhululekile njalo bavikelwe. Ilungelo loluntu lelusiwe lapha eZimbabwe.”
Forum