UMongameli Emmerson Mnangagwa wakwele Zimbabwe uthi ilizwe leli iqakathekisa ukulandelwa kwemithetho njalo ukhetho olusanda kwedlula luqhutshwe kulokuthula.
UMnangagwa, owethule amazwi la emhlangangweni omkhulu owe-United Nations General Assembly oqhubekela phambili eNew York kwele Melika, ukhuthahaze njalo ukuthi kwesulwe izijeziso zomnotho ezetheswa ilizwe lakhe.
Uthe izijeziso zenotho zibisela muva eleZimbabwe.
“IZimbabwe iqhubekela phambili ithuthukisa umbuso wentando kazulu, lokulandelwa kwemithetho kulandela ukhetho luka 2023 olusanda kuqhutshwa. Ngilenjabulo enkulu ukulazisa ukuthi ilizwe lethu liqhube ukhetho olukhululekileyo kulokuthula. IZimbabwe isileminyaka engamatshumi amabili lantathu ilezijeziso zomnotho ezetheswa ngamazwe angentshonalanga. Izijeziso lezi zazihlose ukuphazamisa uzibuse wabantu beZimbabwe ngakhoke sikhuthaza ukuthi izijeziso lezi zesulwe. Siqhubekela phambili sibonga amazwe ama lathi. Laloba kulezijeziso lezi abantu beZimbabwe bazinikele ukuthuthukisa ilizwe labo besebenzisa okutholakala kulo.”
Uqhubekele phambili esola kakhulu ukuphiwa imali kwamabandla ezombusazwe aphikisayo kanye labanye athi bahlamukela ohulumende.
“Sisola kakhulu amanye amazwe alamandla, atshumayela ukuthula, amalungelo oluntu lokubusa kwentando kazulu kodwa kwelinye icele esipha imali kwabahlamukela lokugenqula ohulumende abakhethwe nguzulu. Sisola njalo ukusetshenziswa kwezijeziso zomnotho njengesikhali esisetshenziswa kubudlelwano lamanye amazwe njengalezo ezetheswa IZimbabwe.Lokhu kwenza kungabi lokwethembana okudingakalayo ukuze kube lentuthuko yamazwe omhlaba.”
Wengezelele esithi umnotho welizwe lakhe uqhubekela phambili ukhula ngoba bethuthukisa ubudlelwano lamanye amazwe kwezamabhizimusi.
“Siyamukela abafuna ukusebenza lathi belandela imithetho yelizwe lethu. Sibona intuthuko yomnotho emangalisayo eZimbabwe. Kuminyaka emithathu edluleyo ilizwe lethu yilo elibe lomnotho okhule ukwedlula amanye amazwe ezansi yeAfrica. Phezu kwalokhu iZimbabwe iqakathekisa ukuthuthukisa impilo yabantu bayo ikakhulu abasemaphandleni.”
Kusenjalo, ekhuluma lentathelizindaba zeSABC News izolo esemhlanganweni weUnited Nations General Assembly eNew York, umongameli Cyril Ramaphosa uthe inhlanganiso yamazwe ezansi yeAfrica iSADC izaqhuba umhlangano ohlaziya udaba lokhetho lweZimbabwe kulandela imibiko yabaphenya ukhetho abeSADC eyokuthi iZEC yehluleka ukuqhuba ukhetho olukhululekileyo.
Laloba kunjalo, umphathintambo wogatsha olubona ngobudlelwano lamanye amazwe, uMnu Frederick Shava uthi akusoze kube lolunye ukhetho njengoba lwaqhutshwa kuhle.
“Umhlangano lo uhambe kuhle. Ubechaza ukuthi ukhetho luqhutshwe njani eZimbabwe. Okulukhetho oluqhutshwe kuhle kakhulu uMongameli Mnangagwa wanqoba, ibandla lethu eleZanu-PF lanqoba”
Abebandla eliphikisayo eleCCC bona bathi umlomo kawugcwalelwa mfula besithi akula ntuthuko yomnotho eZimbabwe njalo ukhetho luqhutshwe kungela kuthula. Umnu Descent Collins Bajila omela iLobengula-Magwegwe edale lepalamende uthi ukhetho luka 2023 aluqhutshwanga ngendlela efaneleyo.
Umongameli Mnangagwa izolo uqhube umhlangano labanye abakhokheli bamazwe aseSADC abagoqela uMnu Cyril Ramaphosa oweSouth Africa, uMnu Joao Lourenco oweAngola lomnu Felipe Nyusi oweMozambique.
Forum