Ngesikhathi eleZimbabwe limanyane lamanye amazwe omhlaba ekunanzeni ilanga lokuthula emhlabeni jikelele, abamabandla aphikisayo bathi akukho ukuthula elizweni ikanti abeZanu PF bathi kulokuthula lokuzotha elizweni. Inhlanganiso ezikhuthaza ukuthula zona zithi kunengi okumele kwenziwe kwele Zimbabwe ukuze kube lokuthula elizweni.
Lonyaka usuku olwe International Day of Peace, lunanzwa eZimbabwe kulezehlakalo ezimbalwa ezehlela uzulu ikakhulu abakumabandla aphikisayo afana leleCitizens Coalition for Change lona elikhala ngamalunga alo alokhe engazi ukuthula.
Kunje kulokhansila kaWard 4 emzini weEpworth, umnumzana Lonwell Rungano obikwa ethunjwe ngabacatshangelwa ukuba ngabeZanu PF, otshaywe walimala kakubi. Walile ukukhulumisana lentathelizindaba uKansila Rungano esithi ngoba usalindelel imvumo evela kwabebandla lakhe.
Isikhulumeli sebandla eliphikisayo eleCitizens Coalition for Change, uMnumzana Promise Mkhwananzi, uthi aqhubeka ehlukunyezwa amalunga ebandla leli ngabacatshangelwa ukuthi badlelana lohulumende kaMongameli Emmerson Mnangagwa.
“Sithi kuliphutha kakhulu eliyangisayo elizweni leZimbabwe. Thina njengebandla siyakuchothoza kakhulu lokho okwenzakalayo.”
Kodwa osaphethe isikhundla somqondisi obona ngokwethulwa kwemibiko kubandla leZanu PF, uMnumzana Farai Marapira, uthi kabasibandla elitshotshozela udlakela. U-Marapira uthi bayaluqakathekisa usuku olweInternational Day of Peace.
“Ngoba selokhu umongameli Mnangagwa waqalayo ukukhokhela ngo-2017, uhlezi egcizelela njalo nje ngodaba lokuthula, udaba lomanyano, udaba lokubambana lobuzalwane kanye lobudlelwano phakathi kwethu sonke njengabantu beZimbabwe.”
Embikweni wabo, abenhlanganiso yeZimbabwe Peacebuilding Initiative baveze ukuba kungumlandu womuntu wonke ukukhuthaza ukuthula besithi lokhu kusiza njalo ekuthini zifezeke izimiso zama Sustainable Development Goals-SDG’s umhlaba wonke jikelele.
Ingcwethi ecubungula ezombusazwe owenhlanganiso yeZimbabwe Democracy Institute, uMnu. Bekezela Gumbo uthi izehlakalo ezibe khona elizweni kusukela ngesikhathi sokhetho yisibonelo sokuba kuyadingeka ukulondolozwa kokuthula elizweni.
“Ama-sanctions lawa okuhlala kukhulunywa ngawo ayisikho kuthi afakwa ebantwini ngenxa yokuthi abantu bayabazonda kodwa ke siyazehlisela thina ama-sanctions ngenxa yokwehluleka ukulandela ama-rules, imithetho esizibekela yona thina njengelizwe. So abantu sebezaqala ukukhala ukuthi sesifakelwe ama-sanctions
Isikhulumeli samapholisa uAssistant Commissioner Paul Nyathi ugcizelele ukuthi kuliqiniso lokho okwehlele uKhansila Rungano weCCC esithi ubufakazi bukhona emapholiseni ukuthi ngempela ulumangalile loludaba.
Ngaphandle kukaRungano lamanye amalunga aweCCC asethe athunjwa ngemva kokhetho agoqela ukhansila kaWard 26 eHarare, umnumzana Womberaishe Nhende lezihlobo zakhe oMnu. Samuel Mukuhlane loNelson Mukwenha.
Abenhlanganiso ezimbalwa abagoqela eleZimbabwe Human Rights-ZimRights bathi kusadingeka ukuthi eleZimbabwe liqakathekise ukulondoloza ukuthula elizweni. Embikweni wabo abawukhiphe lamuhla wasayinwa ngumqondisi walenhlanganiso umnumzana Dzikamai Bere, abeZimRights baveze ukuthi ukuthula kumele kube lokuzinikela kwenhlangothi ezitshiyeneyo zomvikela ukukhankasela ukuthula hatshi ukuthi kuphelele ekuhlabeleni ingoma yelizwe kuphela iNational Anthem.
Uhulumende weMelika izolo wethule umbiko othi lelo lizwe likhathazekile ngokuhlukunyezwa kwabantu eZimbabwe. Lawa mazwi asekelwa njalo ngunobhala jikelele wenhalnaniso yomanyano wamazwe womhlaba eyeUnited Nations, uMnu. Antonio Guterres.
Olwalonyaka usuku olwe International Day Of Peace lunanzwa phansi kwendikimba ethi: Actions for peace: Our ambition for the #GlobalGoals.
Forum