UMongameli Emmerson Mnangagwa uzakwethula amazwi akhe amqoka emhlanganweni omkhulu weUnited Nations General Assembly ngoLwesine lapho akhangelelwe khona ukusola izijeziso zenotho azetheswa lamanye amalunga eZanu PF nguhulumende weMelika.
Umphathintambo obona ngobudlelwano beleZimbabwe lamanye amazwe uMnu Fredrick Shava utshele iStudio 7 eseNew York, lapho okuqhutshelwa khona umhlangano lo, ukuthi uMnangagwa uzakhuthaza njalo ukubambana emhlabeni jikelele.
Kodwa abanye abalandela ezombusazwe bathi njengemvama, uMnangagwa ukhangelelwe ukutshela eleMelika ukuthi kumele lesule izijeziso lezi ngoba esithi zilimaza uzulu makhaza.
UMongameli Cyril Ramaphosa weleSouth Africa loMongameli weleNamibia uMnu Hage Geingob, bethule imbiko efanayo emhlanganweni munye kuliviki.
URamaphosa uphinde wathi ngaphandle kokulimaza izizalwane zeZimbabwe, izijeziso lezi zilomthelela omubi kakhulu elizweni lakhe.
UMnangagwa uthi izijeziso yizo ezibulala umnotho weZimbabwe ngoba zixotsha abatshali bezimali njalo zisenza eleZimbabwe lehluleke ukwenza ibhizimusi lamanye amazwe kanye lokweboleka imali kumabhanga amakhulu afana leWorld Bank leInternational Monetary Fund.
Kodwa uhulumende weMelika uthi izijeziso lezi ziqondiswe kuMnangagwa mathupha labanye bakhe kuZanu PF abephula amalungelo kazulu, ngakho azilamthelela kuzulu.
I-Melika ithi njalo umnotho weZimbabwe ubulawa yinkohlakalo enziwa yiziphathamandla zikahulumende weZanu PF.
Olwela amalungelo oluntu njalo ekhokhela inhlanganiso yeIbhetshu Likazulu uMnu Mbuso Fuzwayo uthi uMnangagwa uzagijimela udaba lwezijeziso lanxa kulezinto ezibalulekileyo okumele zenziwe nguhulumende wakhe, ezingathuthukisa umnotho, ezifana lokulwisa inkohlakalo.
“Akukho engikukhangeleleyo kuMnangagwa okumangalisayo ngaphandle nje kokuthi athi ilizwe libulawa ngama-sanctions, akukhitshwe ama-sanctions,” kutsho uFuzwayo.
“Kasoze akhulume ngokutshontshwa kwezomnotho lokuthi ilizwe uselithethe walenza angani yinkampani yakhe yedwa nanku phela useqhatsha abantwabakhe.”
Izolo uMnangagwa wethule amazwi emhlanganweni owokucebisana ngokuvikela imikhuhlane efana loweCovid-19, owePandemic Prevention, Preparedness and Response, lapho athe khona uhulumende wakhe usethuthukisa kakhulu umsebenzi wezempilakahle.
Wengeze wathi eleZimbabwe lizilungiselele kakhulu ukumelana lemikhuhlane eyingozi elakho ukuqhamuka.
“Ngemva komkhuhlane weCovid-19 eleZimbabwe seliqinise imisebenzi yalo yezempilakahle... ngesikhathi sobhubhane lweCovid-19 sisungule njalo inkampani elungisa umoya we-gas,” kutsho uMnangagwa.
Ukuphatheka kukaMnangagwa emhlanganweni weUnited Nations General Assembly kusolwa ngabebandla eliphikisayo eleCCC, bona abathi ubengamelanga avunyelwe ngoba enqobe umholi wabo uMnu Nelson Chamisa ngokuqilibezela kukhetho olusanda kwedlula.
“UMnangagwa ubuye lapha ezimele yena yedwa kamelanga iZimbabwe ngoba siyakwazi ukuthi umhlaba wonke uthi ukhetho aluqhutshwanga kuhle, ngakho akulamongameli eZimbabwe,” kutsho ilunga leCCC eMelika uMnu Tim Muringai.
Wengeze wathi uMomgameli Mnangagwa usenge ezimithiyo izolo ngokutshela iUnited Nations ukuthi umsebenzi wezempilakahle eZimbabwe uhamba kahle.
Ilunga leZanu PF uMnu Believe Gaule, yena utshele iStudio 7 ukuthi lanxa evumelana loMongameli Mnangagwa, kunengi okusilelayo kumsebenzi wezempilakahle okumele kulungiswe.
Uthe, “Imizamo emihle enziwa nguhulumende siyayibona siyayinanzelela, sokungani imisebenzi leyi ingaqhubekela phambili ukuze abantu baphathiseke.”
UMnangagwa usanda kunqoba kukhetho olwenziwe nganyanga edluleyo olusolwa ngitsho lamaqula eSADC leAfrican Union esithi aluqhutshwanga ngendlela esuthisayo njelo ehlonipha iziqondiso zomhlaba lezezansi yeAfrica ezilawula ukhetho olukhululekileyo.
Forum