Kuqhamuke udlakela phakathi kwabasekeli bebandla leZanu PF labeCCC phandle kwamahofisi ekhansili yeHarare, eTown House, namuhla ngesikhathi amakhansila amatsha egcotshwa ukuqala umsebenzi. Kulabanye abalimeleyo abagoqela omunye owesilisa obonakale esopha igazi emhlane.
Kube lokuxokozela okukhulu phandle kweTown House, eHarare, lapho okubuthane khona abasekeli beZanu PF labebandla eliphikisayo eleCitizens Coalition for Change, behlabela ingoma zokuchothozana njalo behozana, okubangele ukuthi becine sebetshayane.
Abalimeleyo bagoqela omunye owesilisa obonakale egeleza igazi emhlane. Kucine kungenela amapholisa aqeda umsindo.
Udlakela lolu lusenzakala phandle, phakathi kwamahofisi ekhansili, bekugcotshwa amakhansila asanda kukhethwa afika phose amatshumi ayisithupha, 59.
Kodwa akusakhethwanga umeya wedolobho leli ngoba kulumbiko omise lokhu ovele kuhlangothi olubona ngokwakhiwa kwezabelo olwePublic Works and National Housing, olawule ukuba uMayor akhethwe ngelanga elehlukileyo, okuyinto enzakale njalo koBulawayo izolo.
Omunye wamakhansila eHarare agcotshwe namuhla nguMnu Lovemore Makuwerere omele iWard 24 njalo engowebandla leCCC.
“Sifuna ukuyakha isibhedlela, ama-plans akhona esibhedlela sesilawo so sizacela uzulu labanye abangasincedisa ukuthi siyakhe isibhedlela sona lesi. Udubo lwamanzi asilalo, amanzi kithi ayaphuma nsuku zonke kuWard 24 eHighfields. Okunye engingafisa khona yikuthi sithwale izibi ngoba khonapho yikho lapho esile-challenge khona, sifuna ukuthwala izibi ukwenzela ukuthi i-ward yethu ihlale ihlanzekile.”
UNkosikazi Theresa Taguma Thomas, ongene ngePropotional Representation phansi kwebandla leZanu PF, ufisa ukuba idolobho leli lihlanzeke.
“Ngithe lami ke ngizame ukuze sihlale lathi endaweni ehlanzekileyo. I-Harare kayisamanga kuhle, amakhansili lawa awelinye ibandla leli bayehluleka ukuqhuba umsebenzi wabo kahle. So, we want to challenge them, thina abeZanu Pf, idolobha lethi libuyele esimeni salo.”
Ngaphambilini kokuba lumkhosi uqale, umabhalane omkhulu weHarare, uEngineer Hosea Chisango, wazise ngohlelo oluzolandela ngemva kokufungiswa kwamakhansila la, okugoqela ukuthi kuzamele bangene umhlangano wokubafundisa umsebenzi wabo emhlanganweni abazawenza loMnumzana Tafadzwa Muguti, unobhala obona ngezedolobho leHarare (Harare Metropolitan Secretary for Provincial Affairs and Devolution) anduba kukhethwe uMayor lomsekeli wakhe, kanye labagcinisihlalo labasekeli babo kunsukwana ezilandelayo hatshi namuhla njengalokho obekukhangelelwe ngabanengi. Lokhu kuphikiswe khansila Denford Ngadziwore weCCC, omela iWard 16 kumanisipala weHarare.
“Angiqali ukuba lapha njengeKhansela. Kambe lokhu kutsho ukuthi sesisibhala kakutsha isisekelo sombuso na?.”
Abanye babafungisiweyo bagoqela uNkosazana Cecilia Chimbiri, oweCCC ongene ngeProportional Representation, loMnumzana Simbarashe Chanachimwe, owebandla leZanu PF, owaziwa njalo ngelokuthi "Dhama".
Forum