Kugcotshwe abameli bedale lephalamende namuhla eMount Hampden, abagoqela abakubandla leZanu PF lele Citizens Coalition for Change elithi ukhetho lwatshontshwa nguMongameli Emmerson Mnangagwa lebandla lakhe.
Amalunga amatsha afungiswe nguMnu Kenneth Chokuda, umabhalane wedale lephalamende.
Abameli abanengi bathi bazimisele ukusebenzela uzulu weZimbabwe. Omunye wabalamadlabuzane okusebenzela uzulu nguMnu. Discent Collins Bajila, omele iLuveve/Makhandeni edale
" Kuqakatheke kakhulu ukuza e Phalamende ngoba sanqoba ukhetho olulobuqili. Siyananzelela ukuthi sinqobe ukhetho lolu ngoba abantu bakhangelele ukuthi sibamele sizakwenza lokhu"
UMnu. Pashor Sibanda, owalahla phansi umngciningcebo kahulumende uMnu. Mthuli Ncube kukhetho eCowday Park, laye uthi uzasebenza gadalala ukuze kulungiswe okuhlupha abantu bakuleyondawo.
" Esikukhangeleleyo yikuthi sakhe imthetho ekhwabithwa uzulu wonke. Sifuna ukukhangela ukuba iZimbabwe ikholiswa ngabantu abatsha labadala"
Omela omama ephalamende eHarare, uNkosikazi Ellen Shiriyedenga, uthi uzakhuluma kakhulu ngokubhekane labesifazana.
" Njengo mmeli wabo mama ngizakwenza konke okusemandleni ami ukuba ngikhulume indubo ezikhathaza omama lapho sengiqale umsebenzi ephalamende"
: UMnu. Tafadzwa Mugwadi, omele iBuhera West edale lephalamende, uthi ulethemba lokuthi amalunga wonke azasekela okufiswa nguhulumende webandla leZanu PF.
" Okwenzakale namhlanje kutshengisa ukuthi sesiqhubekela phambili njengelizwe. Ngithemba sizakhulumisana kakuhle ephalamende. Ngithemba ukuba abangane bethu abaphikisayo bazakuma umkhuba wabo wokuphikisa mahlayana nje"
Inengi lithi ukungena kwebandla leCCC ephalamende lakumakhansili kuzakwenza ukuba kubenzima ukwethenjwa ngu zulu ukuba kabavumelani lempumela yokhetho. Kodwa ingcwethi kwezombusazwe ezimeleyo, uMnu Bekezela Gumbo, uthi benze kuhle ngokungena ephalamende
"Kulicebo elihle kakhulu ngoba abantu ababavoteleyo bafuna ukukhokhelwa loba eGomola loba eParadise. Kumele isebenzise indawo lezi ukutshengisa abantu ukuba bayasebenza"
Idale le phalamende ele National Assembly lilabameli beZANU PF abalikhulu lamatshumi ayisikhombisa lasithupha -176, abeCCC balikhulu lantathu-103 kuthi indawo yase Gutu West imelele ukuba lommeli ngemva kokuba omunye owayencintisa kukhetho ezimele uMutonho Mutonho wabhubha kungakenziwa ukhetho. Kuzakwenziwa ukhetho lwama by elections eGutu West.
Kuphinde kwagcotshwa abameli bedale leSenate lapho ibandla leZANU PF elilabameli abangamatshumi amathathu lantathu - 33, eleCCC lilabangamatshumi amabili lasikhombisa - 27 kuthi induna zilabameli abalitshumi lasitshiyagalombili-18. Abantu abaphila lobugoga bamelwe ngababili.
Ukugcotshwa kwabammeli bephalamende kutsho ukuba umsebenzi wephalamende usuqaleli njalo uzaze uphele ngomnyaa ka2028 lapho okuzenziwa khona olunye ukhetho.Idale lephalamende lizakhetha isikhulumeli sephalamende lomsekeli waso kusasa.
Forum