Ngalizwi linye, bathi okusemahlombe abo, njalo okumele kufezwe ngokuphangisa yikuxazulula udubo lwamanzi idolobho leli elibhekane lalo, loba nje lingcelezelane lomfula uZambezi.
Isiphathamandla sekhansili yaleli dolobho, uMnumzana Ronnie Dube, uchasisa kabanzi ngodubo lwamanzi.
“Amanzi lapha esiwathatha khona emfuleni, kulenkalakatha yempompi edubukileyo, yiyo esizama ukuyilungisa. Sesize sabiza labo contractor abavela koBulawayo ukuthi basincedise.”
Omunye wabafungiswe ukuqala umsebenzi emela uWard 8, uNkosikazi Priscilla Tshuma-Mhlanga uthi ngaphandle kwamanzi, zinengi izankathaze ezikulindawo.
“Mina nje ngiyisikhulumeli sikazulu, okwakhathesi abantu bakhala ngendaba yamanzi, indaba ye sewer, ama roads, izulu lingana kuyagcwala njalo asila loba igravel.”
Ongumqondisi –chief whip, wamakhansila la, uMnumzana Richard Mnguni uthi uhlupho lwamanzi luyimpica kuzakhamizi ezinengi.
“Into esiyikhangeleleyo kubalela lami yindaba yamanzi ngoba idolobho vele likhala ngamanzi, ngibona nxa siyaqala ukuhlala okufuze sikuxazulule, imigwaqo layo siyavuma, kodwa amanzi kumele siwakhangele ngoba basithembisa ukusifakela ama reservoirs enyangeni ezizayo ngakho kufuze sibone ukuthi kuyenziwa ngokutshetsha..”
Ongene eliqembu elizimele lodwa, uMnumzana Tafadzwa Mtowa, uthi laye uzasebenzisana labanye bakhe abebandla eliphikisayo eleCCC.
“Indaba yakuqala ngamanzi, kodwa ngithanda ukutshela izakhamizi ukuthi akusondaba engafezwa ngalanga linye, yindaba engalungiswa ngemva komnyaka ngoba sisebenzisa impompi ezindala ngakho sidinga isikhathi lokubekezela ukuze ilungiswe.”
Uthi njalo uhlose ukuphakamisa intsha ngezenguqu, lokhu kungeminye yemizamo yokulwisana lohlupho lwezidakamizwa. Kulinhloso, usekelwa nguNkosikazi Mhlanga.
“Intsha esilayo ayilalutho lokwenza yikho bekikho lokhu. Ungakhangela loba ku-manifesto sathi akula ground yokuthi abantwana bengadlalela njalo akula library ukuyabala. Kasilaluthi, loba i-stadium ukuthi beyekwenza imidlalo yabo.”
Omunye wabathathu abangene kuhlangothi lwe Women’s Quota, uNkosikazi Mabukwana Ndlovu, uthi eyakhe injongo yikuza lenhlelo zokuthuthukisa abesifazane.
“Thina sifuna ukuzama ukuphakamisa omama sibancedise ukwenza ama projects ukuze baziphilise ezindlini benelise njalo ukugcina abantwana bebahambise esikolo lokubona ukuthi abangeni emabhawa, ikakhulu intsha yabomama.”
Abesifazane laba bathi okunye njalo abahlose ukukufeza yokutholakala kwendawo zokwenzela imisebenzi yezandla efana lokuthunga, ukweluka amadoyili, amabhasikiti kanye legcebethu ezizathengiselwa izivakatshi.
Ngemva kokuthathwa kwezifungo, UDube ugqibe ngokuqonqosela amakhansila la ukuthi bazaba lomhlangano wokufundiswa ngokujulilileyo okukhangelelwe kibo kulandelwa iUrbans Council Act, qede behlale sekubunjwa amakomithi, ukukhethwa kuka mayor lokunye.
Forum