Amapholisa athi amalunga ebandla elibusayo eleZanu PF yibo ababulele omunye wabasekeli bebandla leCitizens Coalition for Change (CCC) emhlanganweni owenzelwe eKwekwe ngeSonto.
Encwadini yabo elandisa okwenzakale emhlanganweni webandla leCCC eKwekwe, amapholisa akuhlangothi lweCriminal Investigation Department (CID) athi abophe abalitshumi lasithupha - 16 njalo asadinga ogwazwe uKennedy Simbi onguye ogwaze wabulala uMboneni Ncube, webandla leli.
Abahlasele umhlangano weCCC bacatshangelwa ukuba ngabebandla elibusayo leZanu PF abeze begqoke izembatho zeCCC, baqala ukujikijela amatshe sebephakathi kwabanye.
Umkhokheli weCCC, uMnu. Nelson Chamisa, utshele intathelizindaba ukuba ngamanga aluhlaza tshoko lokho osekukhulunywa ngabe ZANU PF abathi yibo abazibangele lolodlakela.
“Yiliphi elinye ibandla elilezidumbu ezinengi, yiliphi elinye ibandla lezombusazwe loba inkokheli yebandla lezombusazwe asebebulale abantu abanengi, ngenxa yodlakela, yiZanu PF. Bathi bona iZanu ngeyegazi, igazi likabani, ligazi lenu? Lelo ligazi lezizalwane.”
Umqondisi enhlanganisweni ephatheke kumikhankaso yokufundisa uzulu phezu kwesisekelo sombuso ye #ThisConstitution, uNkosazana Abigirl Mupambi, uthi kasikho isizatho sokube lube khona udlakela.
“Uyabona iDemocracy, iqakathekile ma kuyikuthi thina njengabantu siyahlonipha njalo siyalandela lokho okufuze sikulandele. Akulancedo ukuthi sithi siku-democracy kumbe sithi we are a democratic country lapho singahloniphi our democratic diversity.”
Enye ingcwethi ecubungula ezombusazwe, uMnu. Mlindelwa Mancitshana, laye uyalusola loludlakela.
“Indaba yodlakela eyenzakala elizweni khathesi, ukwethuselana esikubonayo kusenzakala kumabandla ezombusazwe lawa, kuyinto elusizi kakhulu ngoba akufanelanga, akufunakali.”
Embikweni wamapholisa, kuvele sobala ukuthi abaphatheke kuloludlakela behlasela abalandeli beCCC kungabasakhulayo baselokitshini leMbizo eKwekwe lapho, uMnu. Settlement Chikwinya, weCCC efuna ukuncintisa khona kukhetho lukamhla ka26 kunyanga ezayo kaMbimbitho olwama by-elections.