Amapholisa ahlome ngemibhobho lezinja ahaze intuthu ehitshayo eye teargas ecitha umbuthano webandla le Citizens Coalition for Change kade umele ukhokhelwe ngumonameli webandla uMnu. Nelson Chamisa namuhla eGokwe kungakhathalekile lokuthi umthethwandaba ophezulu oweHighCourt ubuphe imvumo ibandla leli ukuthi liqhubeke ngomcimbi walo. Wona amapholisa lawo ayephe imvumo lelibandla ukuthi lenze lumhlangano. UBathabile Masuku usethulela loludaba ngokugcweleyo.
Ibandela le CCC litshelwe izolo ukuthi lingaqhubekeli phambili lomhlangano walo eGokwe ngoba uMongameli Emmerson elombuthano edolobheni le Kwekwe. Ibandla leli namuhla ekuseni lihle lagijimisela emthethwandaba loludaba. UMahluli Sylvia Chirau uchaze ukuba kalabufakazi bokuba umkhankaso webandla leli usumisiwe njalo wathi kumele uqhubekela phambili.
Lanxa kunjalo umkhankaso lo awuqhubekelanga phambili ngoba amapholisa amanengi abekade esithi umhlangano ungaqutshwa ngoba bebalutshwana abazalondoloza ukuthula bavuka ulaka bacitha abantu ngentuthu yetear gars bahaza lamanzi ahaqazayo.
Umongameli webandla leCCC umnumzana Nelson Chamisa wazise umsakazo weStudio 7 ecingweni ukuthi wehlulekile ukukhuluma lozulu eGokwe ngoba besesaba ukubulalisa abantu.
"Siyabonga kakhulu ukuthi abantu babuyile ngobunengi babo, bekugcwele abantu. Ngehluleke ukuthi ngiphume ngikhulumisane labantu ngenxa yama tear gas lamota zamanzi. Ngesikhathi sekuphele ama teargas amapholisa bathwale nzima ngoba abantu bebebanengi, bacine bebaleka. Kodwa uzulu ujabulile, indawo lapho ebengisima khona abantu batshengisele injabulo. IGokwe ibe yilithanga, abantu bafuna inguquko," kutsho uChamisa.
Umnumzana Gift Ostallos Siziba umsekeli wesikhulumeli sebandla le Citizen Coalition for Change (CCC) uthi ibandla leZANU-PF lithume abezomvikela ukuthi bachithe abantu emhlanganweni wabo obusemthethweni.
“SiseGokwe lamuhla okufanele kube le Rally yethu ebe cleared ngama pholisa. Ngeviki edlulileyo sayenza amalungiselelo onke kodwa esikubonayo yikuthi ngenxa yokuthi uMnangagwa ubele rally eKwekwe sebemise inhlelo zethu. IZANU ithume amapholisa ukuthi bafake i tear-gas, bafafaze amanzi indawo yonke kodwa uMongameli uAdvocate Nelson Chamisa nguye omelelwe yizizalwane zeGokwe ngenxa yokuthi thina akula bantu esibabhasileyo, abantu esizibabona ngabaseGokwe. Injongo kuyikuthi sikhulume ngikhetho oluzayo ngenxa yokuthi abantu sebedinwe ngokuyethuselwa langokwethuselwa yi ZANU-PF ukuthi bayivotele,” kutsho uSiziba.
Unkosikazi Anele Khumalo ilunga lebandla leCitizens Coalition for Change uthi ibandla labo lisekelwa nguzulu kuzo zonke indawo ngakho akula sizatho sokuthwala abantu ukuthi baye emkhankasweni othile.
“Okwenza ibandla leZANU-PF lifune ukusincindezela yikuthi sebenanzelele ukuthi thina sisekelwa ngabantu bonke elizweni. Okulasizatho sokuthi nxa kule rally abantu bahanjiswe ngamabhasi njengalokhu esikubona Ku ZANU-PF. Abantu bakhathele ngohulumende ongabanakiyo sekuyisikhathi sokuthi uMongameli oqotho uNelson Chamisa akhokhele,” kutsho uKhumalo.
Umnumzana Melusi Nkiwane umhlali wakoBulawayo eSizinda uthi ukuvinjwa kwebandla leCitizens Coalition for Change kutshengisa ukuthi libandla elingenelisa ukuqethula elibusa ele ZANU-PF.
“Kubalulekile ukuthi uzulu ananzelele ukuthi vele ngesikhathi sokhetho kujayelekile ukuthi kube lamacebo lamaqhinga enziwa ngamabandla. Leli elokisebenzisa amapholisa vele liqhinga leZanuPF. Singakhangela ukuthi yona ivele ibambe laba abomthetho, izaqhubeka isebenzisa abomthetho, izaqhubeka ilokhe iphosa imgoqo ukuthi ivimbe bonke abangathi bayayiphikisa. Njalo singananzelela, ayisoke iphikisane lalaba abancane, iphikisana lalaba abakhanyengani balawo umfutho owokuthi bengafuna ukuthi babaqethule embusweni wabo,” kutsho uNkiwane.
Umnumzana Effort Ncube ingcwethi kwezombusazwe uthi ukukhululeka kokhetho kuqala lapho amabandla ekhankasa hatshi ngelanga lokukhetha inkokheli, ngalokhu okwenziwe kubandla le Citizens Coalition for Change kuveza ukuthi ukhetho alukhululekanga.
"Inkinga yokuthi amapholisa akhethe uhlangothi ikakhulu a support iZanuPF nxa kuqathaniswa lendlela aphatha ngakhona umthetho ewusebenzisa ngendlela avimbela ngayo amanye ama Oposition parties ukuthi akhankase kuyinto eluhlupho kakhulu eyenzukuthi ukhetho lungabi ngolukhululekileyo. Ukukhululeka kokhetho asibali okwenzakala ngosuku lokuvota kuphela, kodwa sibala loku campaigner ukuthi abantu bayavunyelwa ukuthi bakhululeke bakhankase baye ezindaweni abafuna ukuyakhona bengavinjelwanga ngendlela engafanelanga.”
