Amalunga edale lephalamende, eleNational Assembly, abuyisele uMnu Jacob Mudenda esikhundleni sokuba ngumlawuli walelidale ngoLwesihlanu, kanye lobengumsekeli wakhe uNkosikazi Tsitsi Gezi.
Abebandla leCCC bebengekho edale ngesikhathi kusenziwa lolukhetho njalo bathi batshelwe isikhathi esingayisiso sokuqala kwaloluhlelo.
Amalunga ePhalamende wona afungiswe ukuqala umsebenzi ngoLwesine. UMudenda usethethe isikhundla lesi okwehlandla lesithathu ngemva kokukhethwa okwakuqala ngomnyaka ka2013.
Umkhokheli weZanu PF kulelidale, uMnu Pupurai Togarepi, utshele iStudio 7 ukuthi uMudenda ukhethwe kungela abaphikisayo ngoba abeCCC bebengekho edale.
"Siyathaba ukuba sesilo-Speaker wethu," kutsho uMudenda. "Ngumuntu osebe lomsebenzi lo okwesikhathi eside. Uyawazi umsebenzi wePhalamende. Babuya lapha (abeCCC) begijima bephuzile bephikisa thina sesihlezi phansi kudala."
IPhalamende yeZimbabwe entsha.
Kodwa umkhokheli wamalunga eCCC kulelidale, uMnu Amos Chibaya, yena usole kakhulu indlela ukhetho lolu olwenziwe ngayo, esithi bebetshelwe ukuba lolukhetho luzaqala ngo 11am ekuseni.
Uthe, "Izolo sibatshelile ukuba silomhlangano wethu wokukhetho abazasimela. Besivumelene ukuthi ukhetho luzaqala ngo-11am kodwa sethukile sisizwa kuthiwa ukhetho lwenziwe u-10am engakafiki"
Ocubungula ezombusazwe uMnu Teddy Ncube uthi amalunga eCCC kumele aqakathekise umsebenzi wawo.
"Lokhu kuveza ukuba abantu bePhalamende kabazwisisi umsebenzi wabo. Khonokho ukuthi kulokunye okungaqakathekanga ngiyamangala ukuba bakuthatha ngaphi lokhu," kutsho uMnu Ncube.
Kodwa omunye njalo ohlaziya ezombusazwe, uMnu Bekezela Gumbo uthi abeCCC benze iphutha ngokungabikhona lanxa bona bekulandula ukuthi bakhalele ukuba kulolukhetho.
"Injongo ekuvotelweni yikuba kumele belethe inguquko," kutsho uGumbo. "Izikhundla zonke ezikhona ziqakathekile ukuba bancintise kuzo bazithathe ukuze abantu babone ukuthi bafuna ukubenzelani."
Usomlomo wePhalamende uMnu Jacob Mudenda.
Isikhundla sikaMongameli weSenate besincintiswa phakathi kukaMnu Felix Magalela Mafa Sibanda oweCCC loNkosikazi Abel Chinomona oweZanu PF.
UNkosikazi Mabel Chinomona nguye onqobileyo ngemva kokuthola amavoti angamatshumi amahlanu, 50, kuthi uMafa yena uthole angamatshumi amabili lanhlanu, 25.
Kukhetho lomsekeli kaMongameli wedale leSenate, lulotshwa loludaba, bekutshikilisana uMnu Mike Nyambuya oweZanu PF loNkosikazi Margret Chakabuda oweCCC.
Ekhuluma ngemva kokukhethwa kwakhe uMudenda uthe amalunga alelidale kumele aze ukuzomela izifiso zikazulu ngoba kuPhalamende esanda kwedlula akhona amalunga aqede iminyaka emihlanu engazange awuvule umlomo.
UMudenda uthe uyajabula ngokukhethwa kwamalunga amatsha asuka kumabandla womabili, eleZanu PF leleCCC.
Your browser doesn’t support HTML5
Udaba Lokukhethwa KukaSpeaker Siluphiwa NguMlondolozi Ndlovu