WASHINGTON DC – Sokuqhamuke ukusilela kwedola laseZimbabwe elizweni loba nje limali isilahlekelwe luhlonzi okumangalisayo futhi ingasathengi lutho.
Lokhu kubangelwe ngamanyathelo athethwe nguhulumende lebhanga elikhulu lelizwe eleReserve Bank of Zimbabwe (RBZ) awokuzama okuzinzisa umnotho.
Amabhizimusi abikwa eyidinga ngamehlo abomvu limali ngemva kokwethulwa komthetho ophoqa ukuthi eminye imithelo yempahla ezingena elizweni, i-duty, ihlawulwe ngedola leZimbabwe.
Unobhala kugatsha lukahulumende olubona ngokwethulwa kwemibiko uMnu Nick Mangwana, eloba enkundleni yeTwitter, uthe osomabhizimusi abanengi sebezama ukuthengisa idola laseMelika ukuze bathenge eleZimbabwe, okuyinto engeke ifakazwe yiStudio 7.
Lanxa kunjalo, ocubungula ezenotho uMnu Reggie Shoko utshele lumsakazo ukuthi manengi amankampani alempahla esemingceleni yelizwe eyehluleka ukungena layo ngoba engenelisi ukuthola idola leZimbabwe ukuze ahlawule imithelo emele ibhadalwa ngalimali.
Your browser doesn’t support HTML5
Ingxoxo loMnu Reggie Shoko