HARARE - Umthethwandaba waphezulu oweHigh Court usulahle isicelo sebandla leMovement for Democratic Change (MDC-T) esokuba livunyelwe ukuphikisana lokuvinjwa okwenziwe amalunga alo ukubhalisa ukuncintisa kukhetho lisithi amalunga lawa asezakhweza ezimele ngamunye ngamunye ephikisa inyathelo labeZimbabwe Electoral Commission (ZEC) lokuwalela ukubhadala imali eye-nomination fee kodwa kuyimitshina yabo ebingasebenzi kahle.
Umahluli wedale leHigh Court, uWebster Chinhamorawedale, uthe idale lakhe kalivunyelwa ngumthetho ukuba lithathe isicelo seMDC T lesi.
Igqwetha lebandla leli, uMnu. Lovemore Madhuku, uthi lokhu kutsho ukuba amalunga alelibandla bazaqhubeka ngesicelo sabo kodwa besenza lokhu bezimele hatshi phansi kwebandla.
“Edale namhanje iZEC ibe ingavumelani lathi isithi idale kalivunyelwa ngoba abancindezelwayo ngabancintisayo hatshi ibandla. UMahluleli uChinhamora uvumelane le ZEC.”
Isikhulumeli seMDC-T, uMnu. Witness Dube, uthi kuyadanisa kakhulu osokusenzakala njalo kungakhanyi lokuthi kuzaba lesisombululo kuloludaba.
“Ngokubona kwethu siyakubona ukuba amathuba ethu ayifiphala kuloludaba. Ngabe leyo mali sayipha abantu ngabe asibanga lohlupho lolu. Siyafuna ukuba kumele senze sifunda.”
UMnu. Devine Hove, owebandla leNationalist Alliance Party, uthi ukhetho lwalonyaka lube lemigoqo eminengi evimbe abantu ukuthi benelise ukubhalisa ukuncintisa.
“Asizange sibeke abazasimela ngenxa yesizatho semali sibona ukuba limali ayihambelani lomumo yomnotho. Usungumdlalo wezikhulu labalemali.”
Ibandla leMDC-T libeke isicelo salo edale leHigh Court lifuna ukuba amalunga alo phose angamatshumi ayisitshiyagalolunye - 87 bevunyelwe ukubhadala ngemva kokwehluleka ukubhadala ngosuku lukamhlaka 21 Nhlangula elalibekiwe ukuthi lokhu kwenziwe.
Kusenjalo, umkhokheli webandla eliphikisayo eleUnited Zimbabwe Alliance, uNkosikazi Elisabeth Valerio, uthe umelele ukuzwa ukuba udaba lwebandla lakhe olufana lalolu olukwaliswa kwakhe ukuncintisa kukhetho luzangena nini edale.
Kolunye udaba olusebulenjini be internet umsekeli weZANU PF, uMnu. Lovejoy Mangwana, ufake isicelo eHigh Court esokuba owayengu mphathintambo kubandla leli, uMnu. Saviour Kasukuwere, angavunyelwa ukuncintisa kukhetho lwalonyaka ngenxa yokuba usehlale isikhathi eside engekho elizweni.
IStudio 7 izame ukukhuluma labemadale beHigh court ukuzwa ngodaba lolu abazise ukuba okunengi kuzavela kusasa, besithi abala okunengi abangakutsho.
Forum