WASHINGTON DC - Inhlanganiso ezilwela amalungelo oluntu ezigoqela eyeLaw Society of Zimbabwe, iZimbabwe Human Rights NGO Forum kanye leWomen and Law in Southern Africa sezisole kakhulu ukutshaywa kwabasekeli beCCC ngabantu abacatshangelwa ukuthi ngamalunga eZanu PF eMurehwa North.
Kumbiko eziyethule zizimele, inhlanganiso lezi zithe amapholisa kumele abophe bonke abaphatheke kudlakela lolu njalo zithi inkokheli yamabandla ezombusazwe layo kumele itshumayele ivangeli lokuthula phambilini kokhetho.
Zithi njalo amakhomishini kahulumende afana leZimbabwe Human Rights Commission, iNational Pease and Reconciliation Commission leZimbabwe Gender Commission kumele abambe iqhaza lamapholisa ukuze kubotshwe bonke ababonakala ku-video esenkundleni zokuxhumana bebhaxabula okhulu labogogo abangamalunga eCCC besithi kungani beqhube umhlangano webandla labo.
Isikhulumeli samapholisa uMnu Paul Nyathi wazise ngoLwesibili ukuthi sebebophe umsolwa oyedwa phezu kodlakela lolu uMnu Never Chimutashu, yena oleminyaka yokuzalwa engamatshumi ayisithupha lasikhombisa, 67.
Ebuzwa yiStudio 7 ngoLwesithathu ukuthi uMutashu uzamiswa nini emthethwandaba, uNyathi uthe lumsakazo kumele uxhumane laye ngaloludaba ngosuku olulandelayo.
Ibandla leZanu PF lona liyakulandula ukuthi ngamalunga alo atshaye abasekeli beCCC.
Igqwetha, uMnu Kuda Hove, utshele iStudio 7 ukuthi lanxa ibandla leZanu PF likulandula ukuthi amalunga alo yiwo atshaye ogogo labokhulu beCCC, ubufakazi obukhona bukhomba sobala ukuthi lelibandla yilo elihlezi libangela udlakela.
UMongameli Emmerson Mnagagwa uhlezi esola udlakela njalo ekhuthaza abantu ukuthi baziphathe ngokuthula. Kodwa udlakela luyaqhubeka lanxa kunjalo. Umbuzo omkhulu ngothi kungani?
“Kungabe kungamazwi nje awakhulumayo ukuze kubonakale angani wenza imizamo,” kutsho uMnu Hove.
"Iqiniso yikuthi uma esefuna sibili ukuthi abantu bakhe batshiyane lokwenza udlame, ngabe siyambona lapho abenze khona udlakela ethatha amanyathelo abambekayo ukuthi abajezise abantu abangcolisa igama lebandla lakhe.”
Your browser doesn’t support HTML5
Ingxoxo loMnu Kuda Hove