WASHINGTON DC - Inhlanganiso emela abongi, eyeZimbabwe Nurses Association, isisole umthetho onqabela abezempilakahle ukuthi bakhalale umsebenzi, isithi uzabangela ukuthi odokotela labongi batshiye umsebenzi ngobunengi baye kwamanye amazwe.
Abayatholakale belecala lokwephuma umthetho weHealth Serives Amendment Bill lo, wona olaya ukuba abezempilakahle abasavunyelwa ukukhalala umsebenzi okwensuku ezintathu zilandelana, balakho ukugwetshelwa ukupikwa okwenyanga eziyisithupha.
Odokotela labo bayasuwola lumthetho, wona othi: “Ugatsha lwezempilakahle luzahlelwa ukuba lugatsha olubaluleke kakhulu… Akula kukhalala umsebenzi okuzaqhubeka okwamahola angu-72 elandelana kumbe amahola angu-72 phakathi kwensuku ezilitshumi lane, 14.”
Umthetho lo usayinwe nguMongameli Emmerson Mnangagwa ngoLwesibili.
Wenza njalo kube licala ukutshotshozela izisebenzi zogatsha lwezempilakahle ukuthi zikhalale umsebenzi.
Odokotela abanengi labongi baphuma buthumuthumu elizweni sikhuluma nje besiyadinga amadlelo aluhlaza emazweni agoqela eleMelika leleBhilithani.
Leyo yinto ekhangelelwe ukudlondlobala njengoba sokwethulwe lumthetho, kutsho umgcicisihlalo wenhlanganiso yeZimbabwe Nurses Association koBulawayo njalo engumongi uMnu Anthony Majongosi.
“Umthetho lowo uzabangela ukuthi ama-health workers atshiye umsebenzi aye kwamanye amazwe… Umthetho lo uyasibamba, uvimba amalungelo ethu,” kutsho uMajongosi ekhuluma leStudio 7.
“Sikhuthaza uhulumende ukuthi abuye kithi sihlale phansi sikhulumisane ukuthi sifunani ukuze kube lengqubelaphambili lathi sisebenze kuhle, kodwa umthetho lo uzabangela ukuthi izisebenzi zitshiye umsebenzi.”
