HARARE - Abamasonto abalitshumi abagoqela abafundisi ababotshwe ngesikhathi bekhulekela ilizwe eHarare bamiswe enkantolo ngoMgqibelo besetheswa icala lokuziphatha ngendlela elobudlwangudlwangu, i-disorderly conduct.
Abalitshumi laba bayingxenye yabantu abangamatshumi amathathu lane, 34, ababotshwe ngoLwesihlanu ekuseni besetheswa icala lokubuthana bengacelanga imvumo emapholiseni.
Kodwa lelocala liphange laguqulwa laba ngelokungaziphathi kuhle emphakathini.
Abangamatshumi amabili lane, 24, babasolwa laba bakhethe ukungayi emthethwandaba ngemva kokuphiwa ithuba lokubhadala ifayindi ngamapholisa.
Abalitshumi abakhethe ukuya emthethwandaba besithi abalacala babalisa uTariro Mukunga, Henry Mutasa, Melusi Nyathi, Mbuso Fuzwayo, Felix Nyika, Edith Gurupira, Irene Gaswa, Patrick Nyaruni, Loice Dube loAngela Henrietta Shoko.
Bakhululwe ngumantshi, uNkosikazi Yeukai Dzuda, ngemva kokubahlawulisa imali yesibambiso, i-bail. Bazabuyela emthethwandaba mhlaka 24 kulinyanga.
Elinye lamagqwetha abamelayo ebelisemthethwandaba uMnu Kossam Ncube uthe “bafikile emthethwandaba lamhlanje, basebephiwa i-bail engangeZ$5000 ngamunye.”
UMfundisi weBrethren-In-Christ Church, uMnu Milson Ndlovu, oyisiphathamandla njalo senhlanganiso yeChristian Alliance uthi kuyadanisa okwehlele abanye bakhe.
“I-space sokukhuleka yi-space sikaNkulunkulu lomuntu, yi-space okungamelanga sivalwe kumbe sivinjelwe noma ngubani noma nguphi ngoba yi-space somuntu loNkulunkulu wakhe,” kutsho uNdlovu.
Abanengi bakusolile kakhulu ukubotshwa kwabantu laba. Emthandazweni wabo, bebeqoqa ukusungula umkhankaso wokugqugquzela umbuso okhululekileyo elizweni owe‘The Zimbabwe We Want Campaign.’
“Kudingeka senze konke, sikhuleke, siye emgwaqweni, sitoyitoye sikhalale imisebenzi, senze zonke izinto, sibhalisele ukuvota, sivote ngosuku lokuvota,” kutsho Ingcwethi kwezombusazwe uMnu Effie Dlela Ncube.
“Bangariga ukhetho, siye emigwaqweni siyevikela ivoti lethu, senze konke esingakwenza kumbe sikhalale imisebenzi ukuze ivoti lethu livikeleke.”
Abasolwa bebemelwa liqula lamagqwetha alwela amalungelo kazulu aweZimbabwe Lawyers for Human Rights, ebelikhokhelwa nguMnu Paidamoyo Saurombe. Umtshutshisi bekunguMnu Moses Mapanga.